Շվեդիայի զինված ուժերը չեզոքացրել են ֆրանսիական «Շառլ դը Գոլ» միջուկային ավիակիրին մոտեցող ռուսական անօդաչու թռչող սարքը։

Շվեդիայի հանրային հեռարձակման ծառայության տվյալներով՝ Շվեդիայի զինված ուժերը ճնշել են Մալմյո նավահանգստում կայանված ֆրանսիական միջուկային ավիակիրին մոտեցող ռուսական անօդաչու թռչող սարքի ազդանշանը։ Ֆրանսիական նավը մի քանի օր է, ինչ գտնվում է Շվեդիայի նավահանգստում՝ ՆԱՏՕ-ի զորավարժությունների շրջանակներում։

Շվեդական լրատվամիջոցների տվյալներով՝ անօդաչու թռչող սարքը արձակվել է ավիակիրի մոտ գտնվող ռուսական նավից։ Շվեդ զինվորականները հայտնաբերել են անօդաչու թռչող սարքը և սկսել են ճնշել դրա ազդանշանը, որից հետո անօդաչու թռչող սարքը անհետացել է։

Այս փուլում հայտնի չէ՝ անօդաչու թռչող սարքը ծովն է ընկել, թե վերադարձել է ռուսական նավ։