Շալվա Պապուաշվիլին հրաժեշտի հանդիպում է ունեցել Բուլղարիայի դեսպանի հետ
Վրաստանի խորհրդարանի նախագահ Շալվա Պապուաշվիլին հանդիպել է Բուլղարիայի դեսպան Վեսելին Վալկանովի հետ, ով շուտով կավարտի իր դիվանագիտական առաքելությունը Վրաստանում։
Խորհրդարանի մամուլի ծառայության հաղորդմամբ՝ հանդիպման ժամանակ կողմերը քննարկել են վրաց-բուլղարական հարաբերությունները և երկու երկրների միջև պատմականորեն սերտ կապերի հետագա զարգացման հեռանկարները։
«Զրույցի ընթացքում անդրադարձ է եղել նաև Վրաստանի և Եվրամիության հարաբերություններին և այդ հարաբերություններում առկա մարտահրավերներին։ Նշվել է Վրաստանի արտաքին հարաբերություններում ինքնիշխանության և ազգային շահերի պաշտպանության կարևորությունը, ինչպես նաև Վրաստանի և ԵՄ երկրների ապագա հարաբերությունների զարգացման հեռանկարները», – հայտնել է խորհրդարանի մամուլի ծառայությունը։
Նրանց փոխանցմամբ՝ խորհրդարանի նախագահը շնորհակալություն է հայտնել Բուլղարիայի դեսպանին երկու երկրների միջև հարաբերությունների խորացման գործում ունեցած ներդրման համար և մաղթել հաջողություններ հետագա գործունեության մեջ։