Վրաստանի խորհրդարանի նախագահ Շալվա Պապուաշվիլին հանդիպել է Հնդկաստանի փոխնախագահի, խորհրդարանի վերին պալատի՝ նահանգների խորհրդի (Ռաջյա Սաբհա) նախագահի Շրի Ռադհակրիշնանի հետ։

Վրաստանի խորհրդարանի մամուլի կենտրոնի տեղեկացմամբ, կողմերը նշել են, որ Վրաստանն ու Հնդկաստանը միավորված են բարեկամական և արդյունավետ հարաբերություններով, որոնք զարգանում են փոխադարձ հարգանքի հիման վրա։

Հանդիպման ընթացքում ընդգծվել է Վրաստանի խորհրդարանի նախագահի՝ Հնդկաստան կատարած պատմական այցի կարևորությունը՝ որպես լավ հնարավորություն խորացնելու խորհրդարանական կապերը։

Կողմերը քննարկել են երկկողմ հարաբերությունների հարցեր, այդ թվում՝ խորհրդարանական համագործակցությունը, ինչպես նաև համագործակցությունը առևտրի և տնտեսության, ներդրումների, տուրիզմի, կրթության և մշակույթի ոլորտներում։

Հանդիպմանը քննարկվել են նաև երկու երկրների համապատասխան տարածաշրջաններում ընթացող գործընթացները։ Ընդգծվել է խաղաղության և կայունության կարևորությունը, շեշտադրվել է Միջին միջանցքի պոտենցիալը և այս ուղղությամբ համագործակցության հնարավորությունները։

Հանդիպումը կայացել է Շալվա Պապուաշվիլիի պաշտոնական այցի շրջանակում Հնդկաստան։ Խորհրդարանական պատվիրակության կազմում են Արտաքին հարաբերությունների հանձնաժողովի նախագահ Նիկոլոզ Սամխարաձեն, Վրաստան-Հնդկաստան խորհրդարանական բարեկամության խմբի ղեկավար Վասիլ Չիգոգիձեն, Տնտեսական քաղաքականության հանձնաժողովի նախագահ Շոթա Բերեկաշվիլին և «Վրացական երազանք» խմբակցության ղեկավարի տեղակալ Գրետա Ծիծավան։