Վրաստանի խորհրդարանի խոսնակ Շալվա Պապուաշվիլին հանդիպել է Սերբիայի Հանրապետության նախագահ Ալեքսանդր Վուչիչի հետ։ Այս մասին հայտնել է Վրաստանի խորհրդարանը։

Խորհրդարանի տվյալներով՝ Շալվա Պապուաշվիլին ընդգծել է Սերբիայի նախագահի Վրաստան կատարած առաջին պաշտոնական այցի կարևորությունը։

«Շալվա Պապուաշվիլին նշել է, որ Վրաստանի և Սերբիայի միջև հարաբերությունները հիմնված են ընդհանուր եվրոպական արժեքների և ապագայի ընդհանուր տեսլականի վրա, այդ թվում՝ Եվրամիությանը լիիրավ անդամակցության նպատակի վրա։ Խորհրդարանի նախագահը շնորհակալություն է հայտնել սերբական կողմին Վրաստանի տարածքային ամբողջականությանը աջակցելու համար և հաստատել է վրացական կողմի անսասան աջակցությունը Սերբիայի տարածքային ամբողջականությանը։

Ալեքսանդր Վուչիչը նշել է երկու երկրների միջև ամուր բարեկամական հարաբերությունները։ Նրա խոսքով, կարևոր է հաջողությամբ ավարտել ազատ առևտրի համաձայնագրի վրա աշխատանքը, ամրապնդել բիզնեսի ներկայացուցիչների միջև կապերը, ինչպես նաև մեծացնել համագործակցությունը զբոսաշրջության ոլորտում։ Նա նաև ուշադրություն է հրավիրել խորհրդարանական համագործակցության կարևորության վրա։ Հանդիպմանը դրական է գնահատվել Սերբիայի խորհրդարանում Վրաստանի հետ բարեկամության խմբի ստեղծումը։

Կողմերը քննարկել են ընդլայնման հարցերով եվրահանձնակատար Մարտա Կոսի վերջերս արված հայտարարությունը, որի համաձայն՝ Եվրամիության ապագա անդամները կարող են չտրամադրել նույն քվեարկության իրավունքը, ինչ ներկայիս անդամները։ Կողմերը նշել են, որ ստեղծված իրավիճակում հատկապես կարևոր է խորացնել ԵՄ անդամակցության թեկնածու երկրների միջև հարաբերությունները և սահմանել ընդհանուր նպատակներ։ Ալեքսանդր Վուչիչը Շալվա Պապուաշվիլիին հրավիրել է Սերբիայի Հանրապետություն։

Հանդիպմանը մասնակցել են նաև հюԽորհրդարանի փոխնախագահ Նինո Ծիլոսանին, Խորհրդարանի փոխնախագահ Սոզար Սուբարին, Տարածաշրջանային քաղաքականության և ինքնակառավարման հանձնաժողովի նախագահ Իրակլի Քադագիշվիլի, Գյուղատնտեսության հանձնաժողովի նախագահ Գելա Սամխարաուլին, Սերբիայի հետ խորհրդարանական բարեկամության խմբի նախագահ Իրակլի Մեզուրնիշվիլի», – ասվում է Վրաստանի խորհրդարանի հայտարարության մեջ։