Դա կարևոր համաժողով էր, հինգ տարին մեկ անգամ աշխարհի բոլոր երկրների խորհրդարանների նախագահներին հնարավորություն է տրվում հավաքվել և խոսել կոնկրետ հարցերի շուրջ, այս հարթակը կարևոր է նաև մեզ համար՝ ճանաչելու այն գործընկերներին, որոնց հետ մենք շատ ընդհանրություններ ունենք, այդ թվում՝ ռազմավարական հարցեր, լինի դա եվրոպական ինտեգրացիա, թե տարածաշրջանային զարգացում,- ասել է Վրաստանի խորհրդարանի նախագահ Շալվա Պապուաշվիլին։

Նրա խոսքով՝ երկու օրվա ընթացքում մենք հնարավորություն ունեցանք զրուցելու եվրոպացի գործընկերների՝ թեկնածու երկրների հետ, որոնց թվում էին Ալբանիան, Մոլդովան, Բուլղարիան։

«Մենք քննարկեցինք նրանց հետ այն գործընթացները, որոնք տեղի են ունենում նրանց երկրներում։ Ալբանիայում բանակցությունները բաց են և հետաքրքիր։ Կայացավ նրանց փորձի փոխանակում։ Դուք գիտեք, որ Մոլդովայի հետ բանակցությունների մեկնարկը հետաձգվել է, և հետաքրքիր էր տեսնել, թե ինչ ակնկալիքներ ունեին նրանք։ Բուլղարիան հունվարից կդառնա եվրոգոտու մաս, և այստեղ նույնպես ակնկալիքները կարևոր են։ Կայացավ շփում Ավստրիայի խորհրդարանի նախագահի և այն գործընկերների հետ, որոնց հետ ես հաճախակի շփում չեմ կարող ունենալ։ Նրանց թվում էին Բրազիլիայի և Մալայզիայի խորհրդարանների նախագահները։ Ե՛վ երկկողմ հանդիպումների միջոցով, և՛ ընդհանուր առմամբ, համաժողովի ընթացքում հնարավորություն ունեցանք քննարկելու բազմաթիվ հարցեր։ Ես հնարավորություն ունեցա ներկայանալ իմ գործընկերների առջև և խոսել նրանց հետ այն հարցերի մասին, որոնցում Վրաստանը դարձել է փորձագետ՝ հիմնվելով սեփական փորձի վրա։ Ես նկատի ունեմ անթափանց արտաքին ֆինանսավորման մարտահրավերը։ Իմ գործընկերների հետ իմ զրույցներից նաև պարզ է, որ նրանք տեսնում են այն խնդիրները, որոնք բացահայտել է Ամերիկայի Միացյալ Նահանգների նոր վարչակազմը», – ասել է Պապուաշվիլին։