Երբ մի պետության ներկայացուցիչ իրեն իրավունք է վերապահում ստանձնել դատավորի դերը մեկ այլ պետությունում, դա իրավական պետության նկատմամբ անհարգալից վերաբերմունք է, – այս մասին գրում է խորհրդարանի նախագահ Շալվա Պապուաշվիլին սոցիալական ցանցում՝ անդրադառնալով Պետեր Ֆիշերի գրառմանը։

Նրա խոսքերով՝ Գերմանիայի դեսպան Պետեր Ֆիշերի հայտարարությունը հանդիսանում է հավատարմագրված դիվանագետի միջամտություն հյուրընկալող երկրի կառավարման գործառույթներին և ճնշում՝ ընթացիկ դատական գործընթացների վրա։

«Իրավական պետություն նշանակում է արդարադատության իրականացում դատարանի կողմից։ Երբ մի պետության ներկայացուցիչ իրեն իրավունք է տալիս մեկ այլ պետությունում ստանձնել դատավորի դերը և որոշել՝ ով է ճիշտ, ով՝ սխալ, դա իրավական պետության նկատմամբ անհարգալից վերաբերմունք է։

Հիշեցնում եմ բոլորին, որ Վրաստանում՝ որպես անկախ պետությունում, գործում է դատական իշխանություն, որի որոշումների ճշգրտությունը մի քանի անգամ հաստատվել է Ստրասբուրգի դատարանի կողմից, այդ թվում՝ բոլոր այն գործերով («Ռուսթավի 2», Գվարամիա, Մելիա, Սաակաշվիլի և այլն), որոնք դարձել են նմանատիպ զրպարտչական հարձակումների թիրախ։ Բացի այդ, այս հայտարարությունն իրենից ներկայացնում է հավատարմագրված դիվանագետի միջամտություն հյուրընկալող երկրի կառավարման գործառույթներին և ընթացիկ դատական գործընթացների վրա ճնշում, ինչը իր հերթին հանդիսանում է Վիեննայի կոնվենցիայի կոպիտ խախտում և կանոնների վրա հիմնված միջազգային կարգի խարխլում։

Սա առաջին դեպքը չէ, երբ օտարերկրյա հավատարմագրված դեսպանը վրացական իշխանություններին և արդարադատությանը հարձակման է ենթարկում դեզինֆորմացիոն նարատիվներով։ Հիշեցնենք, որ մինչ օրս այդ հայտարարությանը մասնակցած որևէ դեսպանատան կողմից ներողություն չենք լսել այն զրպարտչական հայտարարության համար, որով իբր Սաակաշվիլու մահվան շեմին գտնվելու պատճառաբանությամբ պահանջում էին նրան փոխանցել մեկ այլ երկրի, իսկ իրականում՝ ազատ արձակել։ Այն, որ 2023 թվականի փետրվարի 27-ի այդ հայտարարությունն անհիմն և զրպարտչական էր վրացական իշխանությունների և արդարադատության նկատմամբ, հաստատվեց Ստրասբուրգի Մարդու իրավունքների դատարանի 2023 թվականի մայիսի 12-ի որոշմամբ», – գրում է Պապուաշվիլին։