«Լավ կլիներ, եթե գոնե այսօր լսեինք Բրյուսելից հստակ, միանշանակ դիրքորոշում Վրաստանում ռադիկալ խմբերի և իշխանության տապալման վերաբերյալ, որի հետևում, ոչ առանց հիմնավոր կասկածների, թելերը գնում են հենց Բրյուսելի ուղղությամբ», – այս մասին հայտարարել է Վրաստանի խորհրդարանի նախագահ Շալվա Պապուաշվիլին իր այսօրվա ճեպազրույցում։

Նրա խոսքով՝ սա հստակ օրինակ է, թե ինչպես է եվրոպական բյուրոկրատիան վերաբերվում վրաց պետությանը, ժողովրդին և նրանց ընտրությանը։ Պապուաշվիլին ընդգծել է, որ եվրոպական բյուրոկրատիան առաջնորդվում է թաքուն քաղաքական օրակարգով և անհարգալից վերաբերմունքով այն երկրների հանդեպ, որոնք չեն ենթարկվում կույր հնազանդության և փորձում են ինքնուրույն որոշումներ կայացնել ու իրականացնել պետական կառավարման իրենց սուվերեն իրավունքը։

Նրա խոսքով, Եվրոպական հանձնաժողովի կողմից այսօր ներկայացված ընդլայնման զեկույցը, մասնավորապես Վրաստանին վերաբերող հատվածը, միախառնված է հնացած քաղաքական մեղադրանքներով, սուտ տեղեկություններով, թշնամական հռետորաբանությամբ և միտումնավոր վնասարարությամբ։

«Սա Բրյուսելի աշխատասենյակից երևացող Վրաստանն է, որը ոչ մի կապ չունի իրական Վրաստանի հետ։ Զեկույցի այն մասը, որը հիմնված է չափելի պարամետրերով արձանագրված առաջընթացի վրա, գրված է չափազանց չոր և բառաչնչին ձևով, իսկ քաղաքական մասը՝ կտրուկ ագրեսիվ և անարդար է», – հայտարարել է նա։

Պապուաշվիլին նշել է, որ այդպիսի «անարդար, միակողմանի, հակադեմոկրատական, բևեռացում հրահրող և ապակառուցողական մոտեցման արդյունքում հետընթացը հենց ԵՄ ներկայիս կառույցների մոտ է»։

Նա նաև մեղադրել է Եվրամիությանը Վրաստանին «ռուսական ապատեղեկատվության տարածման» մեջ անարդար մեղադրանքներ ներկայացնելու, մինչդեռ լռելու՝ նախկին ընտրություններին միջամտության, հասարակական կազմակերպությունների ու մեդիայի քաղաքական օրակարգով ֆինանսավորման, ինչպես նաև «ատելության լեզվի խրախուսման» մասին։

Պապուաշվիլու խոսքով՝ Վրաստանի կառավարությունը չի պատրաստվում հրաժարվել ԵՄ անդամակցության պատրաստվելու գործընթացից, սակայն՝ ոչ այն Եվրոպական միության համար, որը ներկայումս կառուցում է եվրոպական բյուրոկրատիան՝ զրկված իր բովանդակությունից, այլ այն, որի հիմքում իրական եվրոպական արժեքներն են։

Շալվա Պապուաշվիլու խոսքով՝ Եվրոպական հանձնաժողովի կողմից ներկայացված զեկույցում Բրյուսելը Վրաստանին մեղադրում է, իբր, «ռուսական ապատեղեկատվության տարածման» մեջ՝ օգտագործելով «էթնիկական բնույթի բնութագրում», սակայն միևնույն ժամանակ լռում է այն փաստերի մասին, որոնք վերաբերում են ԵՄ դեսպանների միջամտությանը խորհրդարանական ընտրություններին, հասարակական կազմակերպությունների և ապատեղեկատվություն տարածող մեդիայի՝ քաղաքական օրակարգով ֆինանսավորմանը, ինչպես նաև ատելության և ատելության խոսքի խրախուսմանը ԵՄ միջոցների հաշվին։

Պապուաշվիլին հայտարարել է, որ Բրյուսելը «սուտ է տարածում» նաև խորհրդարանական քննիչ հանձնաժողովի վերաբերյալ՝ այն անվանելով ընդդիմադիրների դեմ վրեժխնդրության գործիք, մինչդեռ չի ասում ճշմարտությունը հանձնաժողովի նպատակների մասին՝ դրանով իսկ, ըստ նրա, «կրկին կանգնելով Սահակաշվիլիի հանցավոր ռեժիմի կողքին և ծաղրելով այդ ռեժիմի զոհերին»։

Նա հավելել է, որ Բրյուսելը խեղաթյուրում է նաև օտարերկրյա ազդեցության թափանցիկության մասին օրենքը՝ ներկայացնելով այն որպես ֆունդամենտալ իրավունքների խախտում, մինչդեռ փաստաթուղթը բառացիորեն թարգմանված է արևմտյան օրինակներից։ Նա ընդգծել է, որ Բրյուսելը լռում է նաև այն մասին, որ ԵՄ գումարներն օգտագործվում են ռադիկալիզմի և ապատեղեկատվության ֆինանսավորման համար, քանի որ դա ստիպված կլիներ բացահայտել սեփական մեխանիզմները։

Պապուաշվիլին հայտարարել է, որ մենք կանգնած ենք պատմության շատ ցավալի պահի առաջ, երբ Բրյուսելը «հստակորեն հեռանում է Եվրոպայից և եվրոպական արժեքներից»՝ փոխարենը վերածվելով «գաղափարականացված բյուրոկրատական մեքենայի», որը ձգտում է լռեցնել քննադատներին, վերացնել ընդդիմախոսներին և նպատակին հասնելու համար ցանկացած միջոց արդարացված է համարում։

Նա պնդում է, որ այս «արժեքային նահանջը» հատկապես արտահայտվել է 2022 թվականի ամռանը, երբ Վրաստանին մերժվել է ԵՄ թեկնածու երկրի կարգավիճակը՝ չնայած այն փաստին, որ Վրաստանը ավելի առաջադեմ էր Մոլդովայից ու Ուկրաինայից՝ ԵՄ ինտեգրման գրեթե բոլոր հիմնական ցուցանիշներով։ Ըստ նրա՝ այդ որոշման նպատակը Վրաստանում անկարգություններ հրահրելն էր։

Պապուաշվիլին նաև ասել է, որ այժմ Բրյուսելը փորձում է Վրաստանի կառավարությանը ենթարկել գաղափարական և քաղաքական դիկտատի՝ կառավարվելով որոշ եվրոպական ինստիտուտների և պոստսովետական քաղաքական գործիչների կողմից, որոնք փորձում են Վրաստանին ներքաշել ավելի խորը հակամարտության մեջ Ռուսաստանի հետ՝ սպառնալով երկրի անվտանգությանը և տարածքային ամբողջականությանը։

Նրա խոսքով՝ եվրոպական իրական արժեքները խաղաղությունն են և հակամարտությունների լուծումը, այլ ոչ թե դրանց հրահրումն ու խորացումը։ Եվ Բրյուսելն այսօր աջակցում է այն խմբերին, որոնք Վրաստանում տարածում են ատելության խոսք՝ համերաշխության փոխարեն, բևեռացում՝ կոնսենսուսի փոխարեն, և բռնություն՝ երկխոսության փոխարեն։

«Այս քայլերից են՝ օրինական և ժողովրդավարական ընտրությունների մերժումը՝ զրոյական ապացույցների պայմաններում, ինչպես նաև ընտրությունների նկատմամբ դիտարկման ամենահեղինակավոր ինստիտուտի՝ ԵԱՀԿ/ԺՀՄԻԳ-ի զեկույցների անտեսումը, ինչը 2020 թվականից ստացավ համակարգային և շարունակական բնույթ», – այս մասին հայտարարել է Վրաստանի խորհրդարանի նախագահ Շալվա Պապուաշվիլին՝ անդրադառնալով Բրյուսելի՝ երկրի ներքին գործերին միջամտությանը։

Նրա խոսքով, դա արվում է իբր ժողովրդավարության և մարդու իրավունքների անունից, սակայն իրականում նպատակ ունի աջակցել «ռադիկալ, բռնարար ընդդիմությանը», որի մեծ մասը, ըստ նրա, ծագել է Սահակաշվիլիի «ռեպրեսիվ, դիկտատորական ռեժիմից»։

Նա նաև մեղադրել է Բրյուսելին այն խմբերի աջակցման մեջ, որոնք հոկտեմբերի 4-ին փորձել են հարձակվել նախագահի նստավայրի վրա։

«Այժմ Բրյուսելը փորձում է խաղալ արժեքների վրա հղում անելով, երբ իրականում Վրաստանի կառավարությունն ու ժողովուրդն ունեն ճշգրիտ պատասխան իրենց պահանջներին՝ երբ խոսքը գնում է ժողովրդավարությանն ու օրենքի գերակայությանը․ դա է վրացական և եվրոպական արժեքները՝ հանդուրժողականություն, օրենքի գերակայություն, խաղաղության հարգում և զարգացում», – ասել է նա։

Պապուաշվիլու կարծիքով, Բրյուսելի նման վերաբերմունքի նպատակը այն է, որ վրաց ժողովուրդը հիասթափվի ԵՄ ինտեգրման գործընթացից՝ որպեսզի, Հունգարիայի, Սլովակիայի և այժմ Չեխիայի նման, ԵՄ չմիանա ևս մի երկիր, որը կուրորեն չի ենթարկվում Բրյուսելի հրահանգներին։

Նա շեշտել է, որ վրաց ժողովրդի պատմական ընտրությունն է՝ չհրաժարվել իրենց ճանապարհից՝ չնայած անարդարությանը, դիմադրությանը և խոչընդոտներին։

«Վրաստանի շանտաժը և ճնշումը չեն աշխատի։ Մենք չենք պատրաստվում հրաժարվել։ Վրաստանը կշարունակի պատրաստվել ԵՄ անդամակցությանը։ Ոչ այն Եվրամիության համար, որը Բրյուսելի ներկայիս բյուրոկրատիան զրկում է եվրոպական բովանդակությունից, այլ այն Եվրոպական միության համար, որի նպատակը եվրոպական արժեքների վերականգնումն է», – հայտարարել է նա։

Պապուաշվիլին նշել է, որ Եվրոպայում իսկական արթնություն է նկատվում, երբ երկրները մեկը մյուսի հետևից ընտրում են կառավարություններ և ռազմավարություններ, որոնք վերադառնում են ԵՄ իրական արժեքային համակարգին՝ մերժելով Բրյուսելի անարդար միջամտությունները ներքին գործերին, ազգային արժեքներին, ժողովրդի կամքին, իրական ժողովրդավարությանը և օրենքի գերակայությանը։

«Մենք հստակ տեսնում ենք, թե ինչպես է Վրաստանի ապագայի ճանապարհը համընկնում ԵՄ իրական արժեքների վրա հիմնված զարգացման ուղու հետ։ Մենք պատրաստ ենք բացահայտել անարդարությունը, պայքարել ճշմարտությամբ, ցույց տալ իրականությունը և հասնել արդար վերաբերմունքի։ Մենք մտադիր ենք գնալ մինչև վերջ», – եզրափակել է Շալվա Պապուաշվիլին։