Մեծ Բրիտանիայի դեսպանատուն ավանդաբար անպատասխան է թողել վրաց հասարակության հարցերն ու մտահոգությունները, փոխարենը մենք ստացել ենք հերթական ոչ բարեկամական հայտարարությունը, – այս մասին սոցիալական ցանցում գրել է խորհրդարանի նախագահ Շալվա Պապուաշվիլին։

Պապուաշվիլին արձագանքում է դեսպանատան այսօրվա հայտարարությանը, որտեղ նշվում էր. «Մեզ մտահոգում է յոթ ոչ կառավարական կազմակերպությունների համար բանկային հաշիվների սառեցումը. սա, հնարավոր է, լինի քաղաքական դրդապատճառներով, որի նպատակն է լռեցնել այդ կազմակերպություններին»։

«Հասարակությանը հիշեցնեմ, որ ընդամենը մի քանի շաբաթ առաջ Մեծ Բրիտանիայի դեսպանատուն փորձում էր ֆինանսավորել ծայրահեղական օրակարգ ունեցող կազմակերպություններին, մասնավորապես՝ Թամար Չերգոլეիշվիլիի կուսակցական պատի թերթը՝ «Թաբուլան», և «Ազգային շարժման» ցուցակում հինգերորդ համարը զբաղեցրած Գիա Ջափարիձեի ռադիկալ կազմակերպությունը՝ «Ապագայի ակադեմիան»։

Երկու դեպքում էլ ֆինանսավորման փորձի պատճառը նրանց կողմից, իբր, տեղական ընտրություններին վերաբերող լրագրողական նյութերի պատրաստումն ու ընտրությունների մոնիթորինգն էր։ Սա այն դեպքում, երբ այդ երկու սուբյեկտների հստակ հայտարարված նպատակն էր ընտրությունների ձախողումը։

Իհարկե, սա հարուցեց հասարակության օրինական կասկածը, թե դեսպանատան նպատակը, հնարավոր է, ոչ թե տեղական ինքնակառավարման ընտրությունների անցկացմանն աջակցելն էր, այլ՝ ընտրությունների սաբոտաժի նպատակ ունեցող անձանց ֆինանսական ուժեղացումը։ Այդ ժամանակ ես կոչ արեցի դեսպանատանը, որպեսզի կասկածները փարատելու նպատակով ամբողջությամբ թափանցիկ լինի և հանրությանը բացատրի, թե ինչպես ստացվեց, որ դեսպանատուն փորձում էր ֆինանսավորել կուսակցական, ռադիկալ խմբերին, ինչպես նաև բացահայտի, թե ում էր ֆինանսավորում 2024 թվականի ընտրությունների ընթացքում։ Ավանդաբար, դեսպանատուն անպատասխան թողեց վրաց հասարակության հարցերն ու մտահոգությունները։ Փոխարենը մենք ստացել ենք հերթական ոչ բարեկամական հայտարարությունը վրաց ժողովրդի հասցեին», – գրել է Պապուաշվիլին։