Մենք արդեն ունենք այդ անատոմիայի նախնական տվյալները՝ ինչպես է Եվրոպական միության կողմից ֆինանսավորվում էքստրեմիզմը Վրաստանում, ինչպես են բաշխվում գումարները այն հայտնի կասկածյալների միջև, որոնք առանձնանում են նրանով, որ չեն հարգում ժողովրդավարական ինստիտուտները, չեն ճանաչում ընտրությունները, չեն ճանաչում Սահմանադրությունը, օրենքները, և ամենակարևորը՝ «հկ»-ները կազմակերպում են ցույցեր, որոնց պահանջը իշխանության տապալումն է, – այս մասին հայտարարել է Վրաստանի խորհրդարանի նախագահ Շալվա Պապուաշվիլին։

Նրա խոսքով, հիմա գնդակը Եվրոպական միության և ԵՄ դեսպանատան դաշտում է, որպեսզի բացատրեն, թե ինչու են ֆինանսավորվում այն կազմակերպությունները, որոնք ներգրավված են այս գործընթացում։

«Եվրոպական խորհրդարանում ընդդիմադիր խմբերը օգտագործեցին պատգամավորական հարցման հնարավորությունը։ Նախկինում դիմում էին, սակայն Եվրահանձնաժողովը չէր տրամադրում տեղեկատվություն, այնուհետև կոմիտեների միջոցով պահանջեցին տեղեկատվություն այն մասին, թե ում է ֆինանսավորում Եվրամիությունը։ Եվրահանձնաժողովը ստիպված եղավ արձագանքել, և այդ պատասխաններից կազմվեց տվյալների բազա, որտեղ մենք տեսնում ենք այն, ինչը մինչ այժմ թաքցվում էր, այդ թվում՝ ԵՄ դեսպանատունը հրաժարվում էր հրապարակել։ Այժմ ունենք նախնական տվյալներ այն մասին, թե որ կազմակերպություններին են գնում այդ միջոցները, որոնց վերաբերյալ վիճաբանություն կար՝ «Սաֆան» ստացել էր 900 000 թե՞ 200 000։ Վերջիվերջո ստիպված եղան իրենք հրապարակել, թե ինչպես էր բաշխվում գումարը։ Ավելի վատ բան իմացանք՝ պարզվեց, որ այդ 900 հազարանոց, երկմիլիոնանոց ծրագրերը, կեսմիլիոնանոց ծրագրերը բաշխվում են այն ռադիկալ, քաղաքական հասարակական կազմակերպությունների միջև, որոնք աչքի են ընկնում պետության դեմ հարձակումներով, ատելության խոսքով, ապատեղեկատվությամբ և մարդու իրավունքների նկատմամբ անհարգալից վերաբերմունքով։ Մենք արդեն ունենք այդ անատոմիայի նախնական պատկերը՝ ինչպես է ֆինանսավորվում էքստրեմիզմը Վրաստանում, ինչպես են բաշխվում այդ գումարները այսպես ասած հայտնի կասկածյալների միջև, որոնք չեն հարգում ժողովրդավարական ինստիտուտները, չեն ճանաչում ընտրությունները, Սահմանադրությունն ու օրենքները, և ամենակարևորը՝ այդ «հկ»-ները կազմակերպում են ցույցեր, որոնց պահանջը իշխանության տապալումն է», – նշել է Շալվա Պապուաշվիլին։

Նրա խոսքով, հենց այս նպատակով է այժմ ծախսվում Եվրոպական միության գումարը, և դրա վերաբերյալ պետք է պարզաբանում տան ԵՄ դեսպանատունը և Բրյուսելը։

«Հիմա գնդակը արդեն ԵՄ-ի դաշտում է, ԵՄ դեսպանատան դաշտում է՝ բացատրի, թե ինչու է ֆինանսավորում այն կազմակերպություններին, որոնք ներգրավված են այս ամենում։ Բացի այդ, պարզվեց, որ 2022 թվականի հունիսին, երբ բեմ բարձրացան «հկ»-ները և պահանջում էին, որ կառավարությունը կազմավորվի իրենց մասնակցությամբ և իրենց վետոյի իրավունքով, նայեք, թե ովքեր էին կանգնած այդ բեմում՝ բոլոր այդ «հկ»-ները այս ցուցակում են։ Ֆինանսավորումը վերաբերում է այդ թվում 2022 թվականին։ Պարզվեց, որ Եվրամիությունը նախ մեզ թեկնածու երկրի կարգավիճակ չտվեց ամբողջովին անարդարացիորեն և առանց որևէ հիմքի, հետո իր կողմից ֆինանսավորված «հկ»-ները Բրյուսելը դուրս բերեց բեմ և պատրաստվում էր իշխանության փոփոխություն իրականացնել «հկ»-ների միջոցով։ Այս տվյալների բազայից սա պարզվեց, և դրա վերաբերյալ պետք է պարզաբանումներ տան ԵՄ դեսպանատունը և Բրյուսելը», – ասել է Շալվա Պապուաշվիլին։