Վրաց ժողովուրդը պահանջում է պատասխան «ԱԼԴԵ»-ից և եվրոպական ուժերից՝ ասելով՝ արդյոք ահաբեկչությունը եվրոպական արժեք է։ Այս մասին հայտարարել է Վրաստանի խորհրդարանի նախագահ Շալվա Պապուաշվիլին։

Նրա խոսքով՝ եթե մարդը խոստովանել է ահաբեկչական գործողություն կատարելը, և նրա կուսակցությունը չի սահմանազատվում նրանից, ուրեմն դա ահաբեկչին հովանավորող կուսակցություն է։

«Սա ճշմարտության պահ է, այդ թվում՝ Եվրոպական միության համար, որովհետև «ԱԼԴԵ»-ն այն քաղաքական խմբերից է, որը ներառում է տարբեր երկրների քաղաքական ուժեր, որոնցից որոշներն իշխանության մեջ են։ Այժմ վրաց ժողովուրդը պահանջում է պատասխան «ԱԼԴԵ»-ից և եվրոպական ուժերից՝ մեզ ասեն՝ ահաբեկչությունը եվրոպական արժեք է թե ոչ։

Եթե մարդը խոստովանել է ահաբեկչություն իրականացնելու փաստը, և նրա կուսակցությունը նրանից չի սահմանազատվում, ուրեմն դա ահաբեկչին հովանավորող կուսակցություն է։ Եթե նրանից չի սահմանազատվում նրա կոալիցիոն թիմը, որի անդամ է նա մինչև այսօր, ապա նրանք էլ են ահաբեկչության հովանավորներ։ Եթե սահմանազատում չի կատարում այն քաղաքական միավորումը, որի անդամ են այդ կուսակցությունն ու կոալիցիան, ապա նրանք նույնպես ահաբեկչության հովանավորներ են։ Մենք այս շաբաթ կսպասենք․ եթե մինչև երկուշաբթի սահմանազատում, բացառում չկատարվի՝ ինչպես «Քաղաքացիների», այնպես էլ «Ուժեղ Վրաստան» և «ԱԼԴԵ» խմբավորումները իմ խոսքում կհիշվեն որպես ահաբեկչին հովանավորողներ։ Մինչև երկուշաբթի ունեն ժամանակ, երկուշաբթիից նրանք պաշտոնապես կդառնան ահաբեկչին հովանավորող կազմակերպություններ», – հայտարարել է Պապուաշվիլին։