Ռուսաստանի նպատակը երբեք չի եղել տարածքների գրավումը, ո՛չ Ղրիմը, ո՛չ Դոնբասը, ո՛չ Նովոռոսիան, մեր նպատակը եղել է ռուս ժողովրդի պաշտպանությունը,- ասել է Ռուսաստանի արտաքին գործերի նախարար Սերգեյ Լավրովը։

Նրա խոսքով՝ Ռուսաստանի նպատակը երբեք չի եղել որևէ տարածքի գրավումը։

«Տարածքային փոփոխությունները հաճախ պայմանավորվածությունների հասնելու անբաժանելի մասն են կազմում։ Նման օրինակները շատ են։ Այս դեպքում ես ևս մեկ անգամ ուզում եմ ընդգծել, որ մենք երբեք չենք խոսել այս կամ այն տարածքը գրավելու մասին։ Ո՛չ Ղրիմը, ո՛չ Դոնբասը, ո՛չ Նովոռոսիան՝ որպես տարածքներ, երբեք մեր նպատակը չեն եղել։ Մեր նպատակը եղել է ռուս ժողովրդի պաշտպանությունը, որը դարեր շարունակ ապրել է այս հողերի վրա, որը հայտնաբերել է այս հողերը և արյուն է թափել դրանց համար», – ասել է Լավրովը։

Բացի այդ, Լավրովը հայտարարել է, որ Մոսկվան չի հրաժարվում ուկրաինական հարցի շուրջ աշխատելու որևէ ձևաչափից, լինի դա երկկողմանի, թե եռակողմ։ Նրա խոսքով՝ բարձրաստիճան պաշտոնյաների մասնակցությամբ ցանկացած շփում պետք է պատրաստվի չափազանց ուշադիր։

«Գլխավորն այն է, որ ցանկացած ձևաչափ՝ «մեկ գումարած մեկ», «մեկ գումարած երկու», բազմակողմ ձևաչափ, որը նույնպես բազմաթիվ է, այդ թվում՝ ՄԱԿ-ի շրջանակներում, անցկացվում է ոչ թե այն պատճառով, որ ինչ-որ մեկը դրա մասին գրում է առավոտյան թերթում կամ երեկոյան ցուցադրում է հեռուստատեսությամբ, կամ քննարկում է այն սոցիալական ցանցերում՝ փորձելով հեռացնել «քարոզչական սերուցքը», այլ որովհետև գագաթնաժողովները պատրաստվում են քայլ առ քայլ, աստիճանաբար, սկսած փորձագիտական մակարդակից, անցնելով բոլոր անհրաժեշտ փուլերը», – նշել է Լավրովը։

Ինչպես նշել է Լավրովը, Մոսկվան միշտ կաջակցի լուրջ մոտեցմանը։ Նույն հարցազրույցում Լավրովը նշել է, որ Ռուսաստանի հետ բանակցությունների սեղանի շուրջ նստելուց առաջ Զելենսկին նախ պետք է վերացնի Ուկրաինայում ռուսախոս բնակչության նկատմամբ խտրական օրենքները։

«Արևմտյան երկրների ներկայացուցիչները կարծում են, որ սա այն մարդն է, ով պետք է ապահովի Ռուսաստանի հետ համաձայնությունները, ինչպես ինքն է համարում նպատակահարմար։ Ոչ ոք չի խոսում այն մասին, որ «Բանակցությունների գնալուց առաջ նրա համար վատ միտք չէր լինի չեղարկել այդ օրենքները», – նշել է Ռուսաստանի արտգործնախարարը։