Այս երկրում, եթե որևէ մեկը հավատում է, որ տեղի կունենան տեղական ընտրություններ, դա մեծ միֆ է։ Չկան ընտրություններ, գոյություն ունի միայն «ընտրությունների» թեմա, որը հենց «Վրացական երազանքն» է տարածում, – այս մասին հայտարարել է Վրաստանի նախկին նախագահ Սալոմե Զուրաբիշվիլին։

Նրա կարծիքով՝ «Վրացական երազանքն» այս թեմայով հասել է արդյունքի՝ հակադրել է ընդդիմությանը։

Զուրաբիշվիլին նշել է. «Մեզ համար ընդունելի չէ ոչ մասնակցության քարոզարշավը, ոչ էլ բոյկոտի քարոզարշավը։ Երկու ուղղություններով էլ բաժանված ենք, ծախսվում են մեծ թվով ֆինանսական և մարդկային ռեսուրսներ, որոնք պետք է ուղղվեին բողոքին, բայց ծախսվում են բոյկոտի քարոզարշավի վրա, որի բովանդակությունը ինձ համար անհասկանալի է»։

«Մենք գտնվում ենք ինչ-որ աբսուրդային թատրոնում։ Յուրաքանչյուրը խաղում է իր դերը այնպիսի մակարդակով, որ հասնում է վիրավորանքների, հայհոյանքների, բուլլինգի։ Իրականում վստահ եմ, որ այս ընտրությունները չեն անցկացվի, իշխանությունը մինչև վերջ չի հասցնի ընտրությունների միֆը, բայց մինչ այդ ընդդիմությունը կիսվեց, բողոքի ալիքը թուլացավ։ Մեր միակ ուժը միասնականությունն է։ Մյուս կողմից՝ բոյկոտի քարոզարշավն էլ աբսուրդ է։ Չկա բոյկոտի օրինակ, որը հաղթանակ է դարձել։ Ակնհայտ է, որ այսօր ինչպես կկեղծվեն ընտրությունները, եթե որևէ մեկը մասնակցի, այնպես էլ կկեղծվի բոյկոտը՝ շատ ավելի հեշտ, որովհետև վախի, փողի, սպառնալիքի պայմաններում հնարավոր է մարդկանց ընտրությունների հասցնել, իսկ եթե բոյկոտը դառնա հաշվարկվող, ապա ռեժիմը կարող է այն ներկայացնել որպես իր հաղթանակ։ Դիկտատորական ռեժիմներում բոյկոտը այսպես է ավարտվում։ Ցանկանում եմ ներկայացնել իրատեսական ծրագիր, որը պահանջում է, որ մենք սթափվենք։ Մեր թեման այն է, թե ինչպես պետք է ուժեղացնենք բողոքը, որն այս ամենին մեզ հասցրեց։ Դա պահանջում է նախևառաջ՝ ընդդիմության պլատֆորմի ուժեղացում և վերակենդանացում։ Դրան պետք է միավորենք բոլոր այն ձևաչափերն ու խմբերը, որոնք հավաքվում են տարբեր ուղղություններով, ունեն կարծիքներ։ Այդ պլատֆորմը պետք է ձևավորի անցումային կառավարություն, քանի որ ոչ ոք վակուում չի սիրում։ Մեր հասարակության մտահոգությունն էլ գալիս է այնտեղից, որ մարդիկ չեն տեսնում՝ եթե սրանք չլինեն, ապա ո՞վ։ Սա մշտական հարց է։ Մենք պարտավոր ենք այս հարցին պատասխան տալ, ցույց տալ հասարակությանը, այդ թվում՝ միջազգային հանրությանը, թե ով կլինի վաղը, երբ այս սկսված քանդման գործընթացն ավարտվի ռեժիմի կործանմամբ։ Մեզնից է կախված՝ սրանք կլինեն ավելի քիչ քաղաքական գործիչներ և ավելի շատ տեխնոկրատ մասնագետներ։ Դա իսկապես անհրաժեշտություն է՝ այս ամենից դուրս գալու համար։ Երրորդ կարևոր հարցը՝ գործողությունների ծրագիրն է՝ այսպես կոչված «վրացական խարտիան», որը պետք է թարմացվի։ Նրա ընդունումից հետո որոշ բաներ փոխվել են, բայց հիմնական մասերը՝ ոչ։ Մենք արդեն ունենք փաստաթուղթ, որը ներառում է այն անհրաժեշտ նախապայմանները, որոնք պետք է իրականացվեն նոր, ազատ խորհրդարանական ընտրությունների համար, ինչը կբերի նաև ռեժիմի քանդմանը», – հայտարարել է Սալոմե Զուրաբիշվիլին։