Կոչ եմ անում բոլորին չհետևել սադրանքներին և շարունակել խաղաղ բողոքի ակցիան,- այս մասին սոցիալական ցանցերում գրում է Վրաստանի նախկին նախագահ Սալոմե Զուրաբիշվիլին։

Նրա խոսքով՝ նման սադրանքները նպատակ ունեն դադարեցնել բողոքի ակցիան։

«Մենք մերժում ենք պետական ​​ինստիտուտների դեմ ուղղված ցանկացած տեսակի բռնություն, հարձակումներ և սադրանքի փորձեր։ Նման գործողությունները, որոնց մենք այսօր ամբողջ օրը ականատես ենք լինում, հստակ ցույց են տալիս, թե ինչպես է ռեժիմը մտահոգված մեր խաղաղ բողոքի ակցիայով։ Նման սադրանքներն ուղղված են այս բողոքի ակցիան դադարեցնելուն և այն ուժի վարկաբեկմանը, որն այսօր ճշգրիտ արտահայտում է քաղաքացիների ազատ կամքը, և որը երեկ ևս մեկ անգամ հստակորեն դրսևորվեց։

Ես աջակցում եմ խաղաղ բողոքի ակցիային՝ որպես մեր հասարակության հասունության և պատասխանատվության արտահայտություն։ Կոչ եմ անում բոլորին չհետևել սադրանքներին և շարունակել խաղաղ բողոքի ակցիան, քանի որ միայն խաղաղ ճանապարհով կարող ենք մեր նպատակին հասնել մինչև վերջ», – գրում է Զուրաբիշվիլին։

Ձեր տեղեկության համար՝ Ներքին գործերի նախարարությունը հայտարարել է, որ «Լելո – Ուժեղ Վրաստան» կուսակցության անդամ Ալեկո Էլիսաշվիլին այսօր լուսաբացին փորձել է հրկիզել Թբիլիսիի քաղաքային դատարանի գրասենյակի շենքը։