Չեմ կարող ներկա գտնվել Հարության պատարագին, քանի որ երկրի նախագահը չի կարող խախտել օրենքը, այլ պետք է լինի օրինակելի, հասարակությանը չի կարող տալ անհնազանդության օրինակ,- այս մասին հայտարարել է Վրաստանի նախագահ Սալոմե Զուրաբիշվիլին տեսաուղերձում:

Զուրաբիշվիլու խոսքով, նրա կյանքում չի եղել դեպք, երբ Հարության տոնին ներկա չլիներ պատարագին, սակայն ստիպված է բացառություն անել, քանի որ պետք է ենթարկվի կանոններին:

«Երեք օրից Ծաղկազարդ է, 10 օրից՝ Զատիկ: Ես չեմ հիշում իմ կյանքի ոչ մի տարի, երբ Հարության պատարագին կամ թեկուզ Ավագ շաբաթվա որևէ պատարագին չեմ եղել եկեղեցում: Դա մեր ընտանիքում մեծ ավանդույթ է եղել, մեր հավատքի դրսևորումը, սակայն այս տարի այլ դրություն է և չեմ կարող գնալ եկեղեցի՝ Հարության պատարագին, քանի որ երկրի նախագահը չի կարող խախտել օրենքը, այլ պետք է լինի օրինակելի, հասարակությանը չի կարող տալ անհնազանդության օրինակ: Ես վստահ եմ, բոլորս միասին կաղոթենք, եկեղեցում գտնվող հոգևորականները կաղոթեն մեզ համար և դա կլինի մեր հավատքի հաղթանակը, որն այսօր մեր գլխավոր զենքն է այս մեծ պայքարում»,- հայտարարել է Սալոմե Զուրաբիշվիլին: