Վրաստանի նախկին նախագահ և Օդեսայի մարզի նախկին նահանգապետ Միխեիլ Սաակաշվիլին ուկրաինական «24 ալիք»-ի եթերում  հայտարարել է Օդեսայի քաղաքապետ դառնալու ցանկության մասին:

«Ես ցանկանում եմ գնալ և Օդեսայի քաղաքապետ դառնալ: Ես չեմ կատակում, իրապես: Ես շատ եմ ցանկանում Օդեսան ոտքի հանել: Սակայն Օդեսան հնարավոր է ոտքի հանել միայն խաղի բոլոր կանոնները փոխելով»,- ասել է նա: Ըստ որում՝ նա նշել է, որ պատրաստ է Օդեսա մեկնել այն դեպքում, եթե լավ վարչապետ դառնա և այն բանից հետո, երբ այդ պաշտոնում գործունեությունը կավարտի: Քաղաքական գործիչը հայտարարել է իր թիմի ծրագրի գոյության մասին, որի համաձայն՝ Ուկրաինան կարելի է 70 օրում բարեփոխել, իսկ պետական ապարատը  երկու երրորդով կրճատել:

Նա միաժամանակ դարձյալ հայտարարել է նախագահական հավակնությունների բացակայության մասին:

Դեկտեմբերի 12-ին Սաակաշվիլին խոսել էր Ուկրաինայի կառավարությունը ղեկավարելու ցանկության մասին: «Ես պատրաստ եմ ստանձնել Ուկրաինայի նորմալ կառավարության պատասխանատվությունը»,- հայտարարել էր նա՝ նշելով, որ «ոչ մի սոուսով» երկրի նախագահի թեկնածու չի առաջադրվի:

Սաակաշվիլին Օդեսայի մարզը ղեկավարել է 2015-ի մայիսից 2016-ի նոյեմբեր: