Ռուսաստանի և արևմտյան երկրների միջև գերիների փոխանակման արդյունքում ազատ արձակված ամերիկացիները վերադարձել են հայրենիք։ Էնդրյուս ռազմաօդային բազայում, որտեղ վայրէջք է կատարել նրանց ինքնաթիռը, նրանց դիմավորել են ԱՄՆ բանակի անդամները, ինչպես նաև ԱՄՆ նախագահ Ջո Բայդենը և փոխնախագահ Կամալա Հարիսը:

Ազատ արձակված ամերիկացիների թվում են Wall Street Journal-ի լրագրող Էվան Գերշկովիչը և Ազատության ռադիոկայանի լրագրող Ալսու Կուրմաշևան, ինչպես նաև նախկին ծովային Փոլ Ուելանը, ով 2018 թվականից գտնվում է Ռուսաստանում բանտում։

Էնդրյուս բազայում լրատվամիջոցների հետ զրույցում Ջո Բայդենը ևս մեկ անգամ շնորհակալություն հայտնեց դաշնակիցներին, որոնց համար սա ամենադժվար մարտահրավերն էր։

«Ես նրանց խնդրել եմ անել այնպիսի բաներ, որոնք հակասում են իրենց անմիջական շահերին։ Հատկապես Գերմանիային ու Սլովենիային»,- ասել է Բայդենը։

ԱՄՆ նախագահի խոսքով՝ Ռուսաստանում ձերբակալված անձանց ազատ արձակումը հնարավոր է դարձել «վստահության» և «հարաբերությունների» հիման վրա։

Ամերիկյան լրատվամիջոցը գրում է, որ սա «սառը պատերազմից» հետո Ռուսաստանի, Բելառուսի և արևմտյան երկրների միջև գերիների ամենամեծ փոխանակումն էր։ Անկարայում տեղի է ունեցել գերիների փոխանակում. Փոխանակման գործընթացին ընդհանուր առմամբ մասնակցել է 26 մարդ։

Ռուսաստանը արևմտյան երկրներին է հանձնել 16 մարդու, այդ թվում՝ ամերիկացիներից բացի, ռուս ընդդիմադիր քաղաքական գործիչներ Իլյա Յաշինին և Վլադիմիր Կարա-Մուրզանին, ինչպես նաև Ռուսաստանի ընդդիմության առաջնորդ Ալեքսեյ Նավալնիի շտաբի նախկին ղեկավարներին և մարդու իրավունքների պաշտպան Օլեգ Օրլովին։ Մինսկն ազատ է արձակել նախագահ Լուկաշենկոյի կողմից ներում շնորհված Գերմանիայի քաղաքացի Ռիկո Կրիգերին։ Դրա դիմաց արևմտյան երկրները Ռուսաստանին են փոխանցել ՆԱՏՕ-ի երկրներում պատիժ կրող ութ հոգու։ Նրանց թվում է Վադիմ Կրասիկովը, ով Գերմանիայում դատապարտվել է Վրաստանի քաղաքացի Զելիմխան Խանգոշվիլիի սպանության համար։

ԱՄՆ նախագահ Ջո Բայդենը հեռախոսազրույց է ունեցել Թուրքիայի, Նորվեգիայի, Լեհաստանի, Սլովենիայի և Գերմանիայի ղեկավարների հետ և շնորհակալություն հայտնել Ռուսաստանի հետ գերիների փոխանակման գործընթացում նրանց գործընկերության համար։