Ռուսաստանի արտաքին գործերի նախարարությունը հայտարարել է, որ, ելնելով Կուրսկի շրջանում առկա իրավիճակից, Կիևի հետ խաղաղ բանակցությունների հեռանկարը «երկար դադարի մեջ է»։

Ռուսաստանի արտաքին գործերի նախարարության հատուկ ներկայացուցիչ Ռոդիոն Միրոշնիկը Ուկրաինայի վերաբերյալ մամուլի ասուլիսում նշել է, որ ոչ ադեկվատ թշնամու հետ բանակցություններն անբնական են։

«Ուկրաինան Կուրսկի շրջանում իր ահաբեկչական գործողություններով գոնե երկար ժամանակ կասեցրել է խաղաղ բանակցությունների հեռանկարը։ Իմ կարծիքով՝ դիտմամբ են արել։ Բացարձակապես ոչ ադեկվատ թշնամու հետ խաղաղ բանակցություններ վարելն անբնական է»,- ասել է Ռոդիոն Միրոշնիկը։

Տեղեկության համար՝ այսօր Ռուսաստանում արտակարգ դրություն է հայտարարվել Բելգորոդի մարզում։ Ըստ շրջանի նահանգապետ Վյաչեսլավ Գլադկովի՝ իրավիճակը Բելգորոդի մարզում ծայրահեղ լարված է։ Գլադկովը նաև նշում է, որ մոտ ապագայում մտադիր է դիմել Ռուսաստանի իշխանություններին՝ Բելգորոդում, ինչպես Կուրսկում, դաշնային արտակարգ դրություն հայտարարելու համար։