Ռուսաստանի արտաքին գործերի նախարարության հայտարարության համաձայն՝ Ռուսաստանը դատապարտում է ԱՄՆ-ի գործողությունները Կուբայի դեմ։

Ռուսաստանի արտաքին գործերի նախարարության խոսնակ Մարիա Զախարովան Վաշինգտոնի գործողությունները անվանել է Կուբայի նկատմամբ ճնշման ռազմավարության վերադարձ և այն տնտեսապես խեղդելու փորձ։

Զախարովայի խոսքով՝ Մոսկվայի և Հավանայի միջև համագործակցությունը ուղղված չէ երրորդ երկրների դեմ և կշարունակի զարգանալ։

Ռուսաստանի արտաքին գործերի նախարարության ներկայացուցիչը նշել է, որ Կուբայի դեմ նոր փաստաթղթում ԱՄՆ-ն Ռուսաստանը դասակարգել է որպես «թշնամական» և «չարամիտ» պետություն։

«Միակողմանի պատժամիջոցները ինքնիշխան, անկախ պետությունների դեմ, որոնք սահմանվել են ՄԱԿ-ի կանոնադրության և միջազգային իրավունքի այլ նորմերի խախտմամբ, կտրականապես անընդունելի են։ Մենք խստորեն դատապարտում ենք Հավանայի դեմ անօրինական սահմանափակող միջոցառումները և Կուբայի ղեկավարության և քաղաքացիների վրա գործադրվող ճնշումը», – նշել է Զախարովան։