Լեհաստանի արտաքին գործերի նախարարը արձագանքում է Հունգարիայի վարչապետի հայտարարությանը, որում Օրբանը պաշտոնապես դատապարտել է ռուսական անօդաչու թռչող սարքերի ներխուժումը Լեհաստանի օդային տարածք։

Ռադոսլավ Սիկորսկին սոցիալական ցանցերում դիմել է Վիկտոր Օրբանին և խորհուրդ տվել դադարեցնել Ռուսաստանին աջակցելը՝ կեղծ համերաշխություն ցուցաբերելու փոխարեն։

«Ո՛չ, Վիկտոր։ Այս միջադեպը հաստատում է, որ ռուսական ագրեսիան պետք է դատապարտվի։ Խնդրում եմ ապաարգելափակել ԵՄ պաշտպանության համար հատկացված միջոցները, հաստատել ավելի խիստ պատժամիջոցներ ագրեսորի դեմ և վերացնել Ուկրաինայի ԵՄ-ին անդամակցության բանակցությունների մեկնարկի վրա դրված վետոն», – գրել է Լեհաստանի արտաքին գործերի նախարարը սոցիալական ցանցերում։

Վիկտոր Օրբանը համերաշխություն է հայտնել Լեհաստանին և անընդունելի է անվանել անօդաչու թռչող սարքերի կողմից երկրի տարածքային ամբողջականության խախտումը։