«Մենք կարծում ենք, որ վիզային սահմանափակումները պետք է կիրառվեն նրանց նկատմամբ, ովքեր պատասխանատու են ռեպրեսիաների համար, և ոչ թե վրաց ժողովրդի», – այս մասին հայտարարել է Լեհաստանի արտգործնախարար Ռադոսլավ Սիկորսկին։

Սիկորսկին պատասխանել է հարցին, թե ինչ է Լեհաստանի դիրքորոշումը վիզալիբերալիզացիայի դադարեցման հարցում։

«Ես ծնվել եմ կոմունիստական Լեհաստանում։ Դա ավտորիտար ռեժիմ էր, բայց որոշ ժամանակահատվածներում թույլ էր տալիս մեզ ճանապարհորդել արտասահման։ Այդ ժամանակ մենք հատկապես գնահատում էինք այն երկրները, ինչպիսիք են Ավստրիան, Շվեդիան, Արևմտյան Բեռլինը, որոնք մեզ հնարավորություն էին տալիս մուտք գործել առանց վիզայի։ Դա մեզ համար պատուհան էր դեպի աշխարհ։ Մենք կարծում ենք, որ սահմանափակումները պետք է կիրառվեն նրանց նկատմամբ, ովքեր պատասխանատու են ռեպրեսիաների համար, և ոչ թե վրաց ժողովրդի», – նշել է Ռադոսլավ Սիկորսկին։

Նրա պարզաբանմամբ, «Լեհաստանը աջակցում է Վրաստանի հարցում ԵՄ բարձր ներկայացուցիչ Կայա Կալասի քաղաքականությանը, որի նպատակը ներկայումս Վրաստանի կառավարության համոզելն է՝ դադարեցնել ընդդիմության նկատմամբ իրավական հետապնդումները»։

«Ես հանդիպել եմ Վրաստանի նախկին վարչապետին, ում դեմ ներկայացված մեղադրանքները, ըստ ինձ, լիովին կեղծ են թվում։ Եվ մենք աջակցում ենք վրաց հասարակությանը նրանց եվրոպական ձգտումներում։ Հուսով ենք, որ Վրաստանի կառավարությունը կկատարի այն, ինչ խոստացել էր ընտրությունների ժամանակ՝ ոչ թե այն, ինչ այժմ է անում, ինչը հեռացում է Եվրոպայից», – հայտարարել է Ռադոսլավ Սիկորսկին։

Բացի այդ, Լեհաստանի արտաքին գործերի նախարարության կայքում հրապարակվել է տեղեկատվություն Բրյուսելում կայացած ԵՄ խորհրդի նիստի մասին։

Պաշտոնական հաղորդագրության մեջ ասվում է, որ նախարար Սիկորսկին խորացող մտահոգություն է հայտնել Վրաստանում քաղաքական իրավիճակի վերաբերյալ, որն ըստ նրա՝ գնալով ավելի է նմանվում ավտորիտար կառավարման մոդելի, իսկ ռուսական ազդեցությունը մեծանում է։

Նրա պարզաբանմամբ՝ Լեհաստանը սպասում է, որ Վրաստանի իշխանությունները անհապաղ ազատ արձակեն ձերբակալվածներին և սկսեն երկխոսություն ընդդիմադիր կուսակցությունների հետ։ Հաղորդագրության մեջ նշվում է նաև, որ նա հայտնել է իր աջակցությունը Եվրահանձնաժողովի փոխնախագահ Կայա Կալասի առաջարկած միջոցառումներին, այդ թվում՝ պատժամիջոցների ոլորտում։