Փետրվարի վերջին, մարտի սկզբին կունենանք լրացուցիչ պատվաստանյութեր, մեր նպատակն է, որ Վրաստանում լինեն առողջապահության համաշխարհային կազմակերպության կողմից ճանաչված պատվաստանյութեր. Գիորգի Գախարիա
Հարուստ, համակարգային պետությունները գնալով ավելի խիստ սահմանափակումներ են ընդունում, քանի որ տեսնում են, որ չեն կարող իրականացնել պատվաստումների ծրագիրը, որը նախապես կարծում էին, որ կիրականացնեն: Սա օբյեկտիվ իրողություն է, – այս մասին հայտարարել է Վրաստանի վարչապետ, Գիորգի Գախարիան:
«Մեր դեպքում, շատ քրտնաջան աշխատել ենք, և ուզում եմ շնորհակալություն հայտնել Առողջապահության համաշխարհային կազմակերպության ղեկավարին: Վերջին ամսվա ընթացքում մենք շատ սերտ շփում ենք ունեցել, և արդյունքում կարող եմ ասել, որ Վրաստանը կլինի առաջիկայում «Փայզեր» պատվաստանյութ ստացող առաջին 18 երկրների ցուցակում: Մենք «Փայզերի» պատվաստանյութը կստանանք առաջին փուլում միայն այն պատճառով, որ, համաձայն մեր պատվաստումների ազգային ծրագրի, մենք նախ պատվաստելու ենք բժշկական ոլորտի աշխատողներին, ինչը չափազանց կարևոր է», – ասել է Գախարիան:
Գիորգի Գախարիայի խոսքով, Վրաստանը շարունակում է աշխատել երկիր լրացուցիչ պատվաստանյութեր բերելու ուղղությամբ:
«Մենք շարունակում ենք աշխատել և փետրվարի վերջին, մարտի սկզբին երկրում կունենանք լրացուցիչ պատվաստանյութեր: Մեր հիմնական նպատակն է Վրաստանում լինեն Առողջապահության համաշխարհային կազմակերպության կողմից ճանաչված և թույլատրված պատվաստանյութերը, որը ռիսկ չի առաջացնի մեր քաղաքացիների համար: Հետևաբար, մի կողմից, մենք զգույշ ենք, բայց մյուս կողմից, մենք հասանք այն բանին, որ Վրաստանը առաջիններից մեկը կստանա «Փայզերի» պատվաստանյութը: Եվս մեկ անգամ կրկնում եմ, ըստ պատվաստումների ազգային ծրագրի, առաջինը կպատվաստվեն բժիշկները»,- հայտարարել է Գախարիան:
