Վրաստանի Պետական անվտանգության ծառայությունը (ՍՈՒՍ) կալանավորել է «Միացյալ ազգային շարժում» կուսակցության քաղաքական խորհրդի անդամ Լաշա Ծանավային՝ օտարերկրյա քաղաքացուց բնակության թույլտվություն ստանալու ապահովման դիմաց դրամական գումարը խարդախությամբ յուրացնելու մեղադրանքով։

Այս մասին հայտնի դարձավ ՍՈՒՍ-ում կայացած ճեպազրույցի ընթացքում։

Ինչպես ճեպազրույցի ժամանակ հայտարարել է ՍՈՒՍ-ի հակակոռուպցիոն գործակալության տնօրեն Էմզար Գագնիձեն, հանցագործությունը նախատեսում է 4-ից 7 տարվա ազատազրկում։

«Վրաստանի Պետական անվտանգության ծառայության հակակոռուպցիոն գործակալության աշխատակիցների կողմից իրականացված օպերատիվ-հետախուզական և քննչական գործողությունների արդյունքում, դատարանի որոշմամբ, կալանավորվել է «Միացյալ ազգային շարժում» կուսակցության քաղաքական խորհրդի անդամ Լ. Ծ.։ Գործը վերաբերում է խարդախությանը, մասնավորապես՝ Վրաստանում բնակության թույլտվություն ստանալու ապահովման դիմաց օտարերկրյա քաղաքացուց դրամական գումարը խարդախությամբ յուրացնելու փաստին։

Քննությամբ այս պահին պարզվել է, որ Լ. Ծ.-ն խոստացել է օտարերկրյա քաղաքացուն՝ իր կապերի միջոցով, ապահովել Վրաստանում մեկ տարվա բնակության թույլտվության ստացումը, ինչի դիմաց նրանից պահանջել է 5 600 ԱՄՆ դոլար։ 2025 թվականի մայիսի 21-ին նշված օտարերկրյա քաղաքացին, Լ. Ծ.-ի պահանջով, նրա հաշվեհամարին փոխանցել է նշված գումարի մի մասը։ Դրանից հետո Լ. Ծ.-ն պարբերաբար կապվել է նրա հետ և պնդել է, որ մուծի մնացած գումարը։ Արդյունքում, 2025 թվականի մայիսի 30-ին և հունիսի 12-ին, Թբիլիսի քաղաքում կայացած հանդիպումների ընթացքում, նա Լ. Ծ.-ին լրացուցիչ փոխանցել է 2 500 ԱՄՆ դոլար։

Այսպիսով, Լ. Ծ.-ն, իրավաազրկող յուրացման նպատակով, պահանջված 5 600 դոլարից խարդախությամբ յուրացրել է օտարերկրյա քաղաքացու 2 650 ԱՄՆ դոլարը։ Կարևոր է նշել նաև, որ քննության շրջանակներում, դատարանի որոշմամբ, իրականացվել են գաղտնի քննչական գործողություններ, որոնց արդյունքում ձեռք են բերվել հանցավոր գործողությունները պատկերող տեսաձայնային ապացույցներ։

Խարդախության այս դեպքի առնչությամբ քննությունը շարունակվում է Վրաստանի Քրեական օրենսգրքի 19,180-րդ հոդվածի 2-րդ մասի «բ» ենթակետի հատկանիշներով, ինչը նախատեսում է 4-ից 7 տարվա ազատազրկում»,- ասել է Էմզար Գագնիձեն ՍՈՒՍ-ում կայացած ճեպազրույցի ընթացքում։