Եվրամիությունը պատմության մեջ ամենախաղաղ նախագիծն է, մենք կանգնած ենք խաղաղության, կայունության, զարգացման և բարգավաճման կողքին,- ասել է Վրաստանում Եվրամիության դեսպան Պավել Հերչինսկին։

Լրագրողը Հերչինսկուն հարցրել է, որ «ըստ Բիձինա Իվանիշվիլիի, Վրաստանի կառավարությունը ցանկանում է գործընկերային հարաբերություններ ունենալ Եվրամիության և ԱՄՆ-ի հետ, բայց ոչ պատերազմի հաշվին»։

Ի պատասխան՝ Հերչինսկին նշել է, որ Եվրամիությունը պատմության մեջ ամենախաղաղ նախագիծն է, և կազմակերպությունը ցանկանում է, որ Վրաստանը դառնա այս ընտանիքի անդամ։

«Եվրամիությունը պատմության մեջ ամենահաջող, խաղաղ նախագիծն է։ Մենք հանդես ենք գալիս հանուն խաղաղության, կայունության, զարգացման և բարգավաճման: Մենք որոշեցինք մեր դռները բացել Վրաստանի համար։ Մենք ցանկանում ենք, որ Վրաստանը լինի մեր ընտանիքի անդամը, մենք ուզում ենք, որ Վրաստանը մեզ հետ միասին որոշի մեր հավաքական ապագան։ Հիմա վրացիները պետք է որոշեն՝ ուզում են միանալ մեզ, թե ոչ, դառնալ Եվրամիության անդամ։ Ես անկեղծորեն հույս ունեմ, որ Վրաստանը բաց չի թողնի այս հնարավորությունը»,- ասել է Հերչինսկին։