Պատրաստ ենք արդար փոխզիջման համար, այժմ հերթը ընդդիմությանն է, մեր երկրում քաղբանտարկյալներ չկան, դա գոյություն ուներ Սաակաշվիլիի ժամանակ. Իրակլի Ղարիբաշվիլի
Վրաստանի վարչապետ Իրակլի Ղարիբաշվիլիի հայտարարությամբ, քաղաքական կուսակցությունների միջև երկխոսությունը շարունակվում է, և նա հուսով է, որ այն կավարտվի համաձայնագրով:
Նրա խոսքով, իշխանությունները պատրաստ են հասնել ողջամիտ ու արդարացի փոխզիջման:
«Ինչ վերաբերում է երկխոսությանը, իհարկե, երկխոսությունը շարունակվում է: Ես ուզում եմ թողնել դրական, լավատեսական ակնկալիք, որ համաձայնություն ձեռք կբերվի: Մեր կողմից ոչ մի ապակառուցողական բան չի եղել և չի լինելու, ընդհակառակը, մենք դրան ականատես ենք եղել ընդդիմության կողմից, երբ նրանք իրականում խափանում էին երկխոսությունը և փոխզիջման չէին գնում: Մենք պատրաստ ենք հասնել ողջամիտ և արդար փոխզիջման, այժմ հերթը ընդդիմությանն է», – հայտարարել է Իրակլի Ղարիբաշվիլին:
Ղարիբաշվիլիի պարզաբանմամբ, արտահերթ ընտրությունների հարցը փակված է:
«Մեր երկրում քաղբանտարկյալներ չկան, այն գոյություն է ունեցել ձեր առաջնորդ Սաակաշվիլիի օրոք», – լրագրողների հարցին ի պատասխան հայտարարել է Իրակլի Ղարիբաշվիլին: