Պարզվեց, որ «Վրացական երազանքը» պատրաստ է լուրջ զիջումների գնալ ընտրական օրենսդրության և ընտրական վարչակազմի փոփոխության հարցում: Այս մասին խորհրդարանում «Վրացական երազանքի» ներկայացուցիչների հետ հանդիպումից հետո հայտարարել է ՝ «Մոքալաքեեբի» կուսակցության առաջնորդ Ալեկո Էլիսաշվիլին:

Նրա խոսքով, հանդիպմանը քննարկվել է նաև քաղբանտարկյալների հարցը, բայց համաձայնություն ձեռք չի բերվել:

«Ինչպես գիտեք, ես ու Լևան Իոսելիանին «Մոքալաքեեբի» կուսակցության անունից եկել էինք խորհրդարան, պարզելու, արդյո՞ք «Վրացական երազանքը» լրջորեն պատրաստ է չորս հարցի կապակցությամբ և պատրաստ է թե ոչ փոխզիջման: Չորրորդ փուլից հետո անցավ շատ երկար ժամանակ, հինգերրորդ փուլի հեռանկարը կախված էր օդից և այդ պատճառով եկանք այստեղ: Մենք քննարկեցինք բոլոր չորս կետերը, իհարկե ամենադժվարը քաղբանտարկյալների խնդիրն էր: Ես ուզում եմ հավաստիացնել բոլորին, որ ես և Լևանը բազմիցս ենք բարձրացրել այս հարցը, մենք շատ սկզբունքային ենք եղել, բայց նաև հայտնի է, որ «Վրացական երազանքը» պարզապես չի ճանաչում քաղբանտարկյալների գոյությունը:

Այսօր մենք այստեղ չենք եկել վերջնական համաձայնության համար, մենք պարզապես այստեղ ենք ՝ դիրքորոշումները պարզելու և հստակեցնելու համար: Պարզվեց, որ, ինչպես նախորդ փուլերում, «Վրացական երազանքը» պատրաստ է լուրջ զիջումների գնալ ընտրությունների խնդիրների, ընտրական օրենսդրության և ընտրական վարչակազմի փոփոխությունների վերաբերյալ: Հիմա էլ փոխզիջման գնալու այս պատրաստակամությունը հաստատվել է: Մենք կետ առ կետ հետևում էինք այս ընտրական բարեփոխումների յուրաքանչյուր խնդրին և մի քանի մանրամասներ մնում են չլուծված», – ասել է Էլիսաշվիլին:

Հարցին, թե ում է համարում քաղբանտարկյալներ, Էլիսաշվիլին պատասխանել է. «Առաջ հինգ ազգանուն կար: Այդ հինգից երկուսը դուրս եկան: Սա շատ բարդ դեպք է»:

Միևնույն ժամանակ, այն հարցին, թե ընտրական բարեփոխումների ուղղությամբ ի՞նչ խնդիրներ են մնացել չլուծված, Էլիսաշվիլին ասել է, որ այդ մասին կխոսի համաձայնագրից հետո: