Վրաստանում Նորվեգիայի դեսպանատուն արձագանքում է Գլխավոր դատախազությունում ընթացող քննության շրջանակներում մի շարք հասարակական կազմակերպությունների բանկային հաշիվների վրա դրված կալանքին։

Ինչպես նշում է դեսպանատունը, սա ժողովրդավարության քայքայման ուղղությամբ արված հերթական քայլն է։

«Յոթ հասարակական կազմակերպությունների բանկային հաշիվների կալանքը Վրաստանում ժողովրդավարության խաթարման ուղղությամբ արված հերթական քայլն է և լուրջ հարված բոլոր այն քաղաքացիներին, ովքեր օգտվում են այս կազմակերպությունների կողմից մատուցվող կարևոր ծառայություններից», – գրել է Նորվեգիայի դեսպանատունը։

Դատախազությունում ընթացող քննության շրջանակներում մի քանի ՀԿ-ների բանկային հաշիվներին կալանք է դրվել։ Դատախազության տեղեկությամբ՝ քննությունը վերաբերում է սաբոտաժին, ծանրացուցիչ հանգամանքներում սաբոտաժի փորձին, օտարերկրյա կազմակերպության և օտարերկրյա վերահսկողության տակ գտնվող կազմակերպության համար թշնամական գործունեությանը աջակցելուն, ինչպես նաև Վրաստանի սահմանադրական կարգի, ազգային անվտանգության հիմքերի դեմ ուղղված գործունեության համար ֆինանսների մոբիլիզացմանը։ Դատախազության համաձայն՝ քննությամբ պարզվել է, որ իրավապահների դեմ բռնի գործողություններ իրականացրած ակցիայի մասնակիցների հատուկ միջոցներով ապահովումը համակարգված է եղել, այդ թվում՝ հասարակական կազմակերպությունների միջոցներով։