Համալսարանի փողոցում գտնվող նոր սպորտի պալատը բացվել է ուկրաինացի և վրացի արտիստների մասնակցությամբ բարեգործական մեծ համերգով, որն անցկացվել է մշակույթի նախարարության աջակցությամբ։ Համերգից ստացված հասույթը կտրամադրվի պատերազմից տուժած ուկրաինացի երեխաների և կանանց բարեգործական հիմնադրամին։

Բարեգործական համերգին ներկա է եղել ուկրաինացի երգչուհի Օլյա Պոլյակովան, ինչպես նաև մարիուպոլցի երաժիշտ Մարիանա Ալեքսունը, որը երաժշտական ​​ստեղծագործություններ է կատարել Թբիլիսիի սիմֆոնիկ նվագախմբի հետ։ Հանդիսատեսին են ներկայացել նաև Face, Tika Balanchine & NEW ONE, Անրի Ջոխաձե, Լելա Ծուրծումիա, Նինի Բադուրաշվիլի, Թամար Իվերի, Էլիսո Բոլքվաձե, Էկա Մամալաձե, Նատալյա Քութաթելաձե, Թբիլիսիի սիմֆոնիկ նվագախումբը՝ Վախտանգ Կախիձեի դիրիժորությամբ:

Նոր Սպորտի պալատը պաշտոնապես բացել են հունիսի 11-ին Վրաստանի վարչապետ Իրակլի Ղարիբաշվիլին և Վրաստանի մշակույթի, սպորտի և երիտասարդության հարցերի նախարար Թեա Ծուլուկիանին։

Նշենք, որ նոր մարզապալատը կառուցվել է Վրաստանի կառավարության և սպորտի նախարարության ֆինանսական աջակցությամբ և այն 10 000 հանդիսատեսի համար նախատեսված բազմաֆունկցիոնալ տարածք է։ Շենքը կառուցված է ժամանակակից չափանիշներով և հագեցած է նորագույն տեխնոլոգիաներով։ Պալատում կանցկացվեն ինչպես մարզական, այնպես էլ մշակութային միջոցառումներ։

Ինչպես հայտնի է, այս տարվա սեպտեմբերին նոր մարզապալատում կանցկացվի «Եվրոբասկետ 2022»-ը։