Վրաստանի խորհրդարանի արտաքին հարաբերությունների հանձնաժողովի նախագահ Նիկოლոզ Սամխարաձեն խորհրդարանական պատվիրակության հետ միասին պաշտոնական այցով գտնվում է Կորեայի Հանրապետությունում՝ Սեուլ քաղաքում։

Այցի շրջանակում Նիկოლոզ Սամխարաձեն հանդիպում է ունեցել Կորեայի Հանրապետության Ազգային դիվանագիտական ակադեմիայի ղեկավար Չոե Հյոնգ Չանի հետ։ Հանդիպման հիմնական թեման եղել է երկկողմ դիվանագիտական և քաղաքական հարաբերությունների զարգացումը։

Հանդիպումից հետո անցկացվել է քննարկում ակադեմիայի պրոֆեսորների և փորձագետների հետ՝ Սևծովյան տարածաշրջանի անվտանգության հարցերի շուրջ։

Քննարկման ընթացքում Վրաստանի խորհրդարանի արտաքին հարաբերությունների հանձնաժողովի նախագահը հանդես է եկել զեկույցով, որտեղ անդրադարձել է Վրաստանի առջև ծառացած անվտանգության մարտահրավերներին, տարածաշրջանային անվտանգության խնդիրներին և Ուկրաինայում ռուսական ագրեսիային։

«Կորեայի դիվանագիտական ակադեմիայի պրոֆեսորների և փորձագետների հետ տեղի ունեցավ շատ հետաքրքիր քննարկում։ Խոսեցի ինչպես անվտանգության առկա մարտահրավերների, այնպես էլ ՆԱՏՕ-ի ընդլայնման հարցերի մասին։ Վերանայեցինք նաև Միջին միջանցքի զարգացման թեման և դրա կարևորությունը։ Հատուկ հետաքրքրություն առաջացրեց Վրաստանի տարանցիկ և տնտեսական աճի ներուժի թեման։ Հարցերը հիմնականում վերաբերեցին Ուկրաինայում ընթացող պատերազմի ազդեցությանը Վրաստանի օկուպացված տարածքների վրա, Կովկասում խաղաղության գործընթացին, Վրաստանի հարաբերություններին Կենտրոնական Ասիայի և Մերձավոր Արևելքի երկրների հետ», – հայտարարել է Նիկოლոզ Սամխարաձեն։

Տեղեկությունը տարածել է Վրաստանի խորհրդարանի մամուլի ծառայությունը։