Նիկոլ Փաշինյան. Ռուսաստանը կարևոր գործոն է Հարավային Կովկասում կայունության և անվտանգության ապահովման համար
Ռուսաստանը Հարավային Կովկասում կայունության և անվտանգության ապահովման կարևոր գործոն է,- այսօր ՌԴ նախագահ Վլադիմիր Պուտինի հետ հանդիպմանն ասել է Հայաստանի վարչապետ Նիկոլ Փաշինյանը։
«Մենք մշտական կապի մեջ ենք, շատ հաճախ ենք հանդիպում, հեռախոսով խոսում։ Երկկողմ հարաբերությունների օրակարգը շատ հարուստ է՝ սկսած տնտեսությունից, վերջացրած մշակույթով ու կրթությամբ»,- ասաց Փաշինյանը։
Նա ընդգծել է երկու երկրների ռազմատեխնիկական համագործակցությունը և նշել, որ Ռուսաստանը Հայաստանի ռազմավարական գործընկերն ու դաշնակիցն է, կողմերը սերտորեն համագործակցում են «Եվրասիական տնտեսական միությունում», ինչպես նաև ԱՊՀ-ում և «Հավաքական անվտանգության պայմանագրի կազմակերպությունում»։
Փաշինյանի խոսքով, «ռուս խաղաղապահները կապահովում են Լեռնային Ղարաբաղի տարածաշրջանի բնակչության անվտանգությունը»։
Միաժամանակ նա ընդգծել է «ռուսական խաղաղապահ կոնտինգենտի արդյունավետությունը բարձրացնելու համար» մեխանիզմներ գտնելու անհրաժեշտությունը։
«Մեր տարածաշրջանի գլխավոր խնդիրը Ղարաբաղի խնդիրը լուծելն է։ Այդ մասին այսօր կխոսենք»,- ասաց Փաշինյանը։
Վլադիմիր Պուտինը, իր հերթին, նշել է, որ Լեռնային Ղարաբաղի շուրջ բազմաթիվ խնդիրներ են մնացել։
«Անվտանգության հարցերը, այդ թվում՝ Ղարաբաղի հետ կապված, նույնպես կլինեն մեր ուշադրության կենտրոնում։ Խնդիրները շատ են, համաձայն եմ ձեզ հետ։ Ես և Դուք մշտական կապի մեջ ենք, տասը օրը մեկ անպայման հեռախոսով ենք խոսում, հանդիպումները կանոնավոր են»,- ասել է Պուտինը։