2025 թվականի հուլիսի 15-ին Գորիի մունիցիպալիտետի Խելթուբանի գյուղում ծառայողական պարտականությունների կատարման ընթացքում Շիդա Քարթլիի ոստիկանության վարչության աշխատակիցների վրա մի քանի քաղաքացիներ հարձակում են գործել, – ասվում է Ներքին գործերի նախարարության հայտարարությունում։

Հայտարարության համաձայն՝ միջադեպի արդյունքում իրավապահները ստացել են տարբեր տեսակի մարմնական վնասվածքներ, այդ թվում՝ երեք ոստիկան վնասվածքներ են ստացել սառը զենքի կիրառմամբ։

«Ներկայումս նրանք բոլորը տեղափոխվել են հիվանդանոց, որտեղ ստացել են համապատասխան բուժօգնություն։ Հարձակման նախօրեին իրավապահները ծառայողական պարտականությունները կատարելու ժամանակ կանգնեցրել են ավտոմեքենա՝ ստուգման նպատակով։ Պարզվել է, որ մեքենան վարել է առանց վարորդական իրավունք ունեցող անչափահաս՝ 2009 թվականին ծնված Ս.Ս.-ն։ Ս.Ս.-ն դիմադրել է ոստիկաններին։ Բախմանը միացել են անչափահասի հայրը և նրանց ազգականները, ինչի ընթացքում Ս.Ս.-ն և նրան ուղեկցող անձինք ոստիկաններին վնասվածքներ են հասցրել։ Ոստիկանների վրա խմբակային հարձակում իրականացնելու մեղադրանքով իրավապահները դեպքի վայրում բերման են ենթարկել 1979 թվականին ծնված Գ.Ս.-ին, 2009 թվականին ծնված Ս.Ս.-ին, 1989 թվականին ծնված Ս.Ս.-ին, 1961 թվականին ծնված Վ.Ս.-ին և 1989 թվականին ծնված Մ.Ա.-ին։ Դեպքի առթիվ նախաքննությունը տարվում է քրեական օրենսգրքի 353-րդ հոդվածի 2-րդ մասով։

Ոստիկանների վրա հարձակումների յուրաքանչյուր դեպքին ՆԳՆ-ն կարձագանքի համապատասխան և ամենախիստ իրավական մեխանիզմներով», – ասվում է նախարարության հայտարարությունում։