Վրաստանի ՆԳՆ-ն լրացուցիչ տեղեկատվություն է տարածում Բոլնիսիի մունիցիպալիտետի Նախիդուրի գյուղում տեղի ունեցող զարգացումների վերաբերյալ։

Ինչպես նշել են ՆԳՆ-ում, այն բանից հետո, երբ կենտրոնական մայրուղում տեղի է ունեցել ճանապարհատրանսպորտային պատահար, որի հետևանքով երկու անչափահաս մահացել է, տեղի բնակչությունը հավաքվել է տեղում, և իրավիճակը լարվել է։

«Առերեսումը տեղի է ունեցել տեղում հավաքված քաղաքացիների, ինչպես նաև քաղաքացիների և հասարակական կարգը պաշտպանելու համար տեղում գտնվող իրավապահների միջև։

Հավաքվածները շրջել են վրաերթի մասնակից տրանսպորտային միջոցը, ինչպես նաև շտապօգնության բրիգադի մեքենան։

Ինչպես նաև տեղում վնասել և կոտրել են այլ քաղաքացիների մեքենաների ապակիները։

Հավաքվածները թույլ չեն տվել ճանապարհատրանսպորտային պատահարի մասնակից մեքենաների ուղեւորներին տեղաշարժվել, ինչպես նաեւ թույլ չեն տվել իրավապահներին քննչական գործողություններ կատարել։ Բացի այդ, շտապօգնության բժիշկներին թույլ չեն տվել աշխատել։

Իրավիճակը լիցքաթափելու նպատակով դեպքի վայր են ժամանել ՆԳՆ տարբեր ստորաբաժանումների ներկայացուցիչներ, այդ թվում՝ պարեկային, քրեական և հատուկ նշանակության ստորաբաժանման աշխատակիցներ»,- հայտնում է ՆԳՆ-ն։

Գերատեսչության տվյալներով՝ առերեսման արդյունքում տարբեր աստիճանի վնասվածքներ են ստացել ՆԳՆ մի քանի աշխատակիցներ, տուժել է ութ քաղաքացի, որոնց ցուցաբերվել է համապատասխան բուժօգնություն։ Նրանց մի մասը մինչ այժմ մնում է բուժհաստատություններում։

Մառնեուլի-Բոլնիսի ճանապարհին ճանապարհատրանսպորտային պատահար է տեղի ունեցել, որի հետևանքով երկու դեռահաս է մահացել։ Դեպքի վայրում տեղի է ունեցել բանավոր և ֆիզիկական բախում։

ՆԳՆ-ից հայտնում են, որ ճանապարհատրանսպորտային պատահարի մասնակից վարորդը ձերբակալվել է, հետաքննությունը շարունակվում է։

Բոլնիսիի հիվանդանոցից հայտնում են, որ ճանապարհատրանսպորտային պատահարից հետո առերեսման հետևանքով վիրավորվածներից երկուսի վիճակը ծանր է, և նրանք տեղափոխվում են Թբիլիսի։