Թբիլիսիում և Բաթումիում տարբեր ժամանակներում իրականացված օպերատիվ միջոցառումների և քննչական գործողությունների արդյունքում, ՆԳՆ Կենտրոնական քրեական ոստիկանության վարչության կազմակերպված հանցավորության դեմ պայքարի գլխավոր վարչության և Աջարիայի ոստիկանության վարչության աշխատակիցները ձերբակալել են Ինտերպոլի կարմիր շրջաբերականով հետախուզվող Թուրքիայի Հանրապետության քաղաքացիների՝ 1978 թվականին ծնված Ն.Գ.-ին, 1989 թվականին ծնված Օ.Ք.-ին և 1998 թվականին ծնված Օ.Թ.-ին: Այս մասին հայտնում է ՆԳՆ-ն։

Ըստ գերատեսչության՝ ձերբակալված Օ.Ք.-ն հետախուզվում էր Թուրքիայի Հանրապետության իրավապահ մարմինների կողմից՝ թմրամիջոցների կամ խթանիչների ապօրինի շրջանառության մեղադրանքով, իսկ Ն.Գ.-ն՝ Ինտերպոլի կարմիր ծանուցագրով՝ բռնի կամ խաբեությամբ ազատությունից ապօրինի զրկելու մեղադրանքով։

«Ինչ վերաբերում է Օ.Թ.-ին, ապա նա հետախուզվում էր Թուրքիայի Հանրապետության իրավապահ մարմինների կողմից՝ թմրանյութերի կամ խթանիչների ապօրինի շրջանառության կամ մատակարարման, մարմնական վնասվածքներ պատճառելու, զրպարտության և գույքի գողության մեղադրանքներով։

Ձերբակալվածները Վրաստանի սահմանը հատել են դեռևս նրանց նկատմամբ միջազգային հետախուզում հայտարարելուց առաջ։ Իրավապահ մարմինների աշխատակիցների կողմից իրականացված քննչական գործողությունների արդյունքում Օ.Ք.-ն ձերբակալվել է Թբիլիսիում, իսկ Ն.Գ.-ն և Օ.Թ.-ն՝ Բաթումիում։ Ներկայումս ձերբակալվածների նկատմամբ իրականացվում են օրենքով նախատեսված նախնական արտահանձնման ընթացակարգեր», – ասվում է Ներքին գործերի նախարարության կողմից տարածված տեղեկատվության մեջ։