Ներքին գործերի նախարարության կենտրոնական քրեական ոստիկանության դեպարտամենտի աշխատակիցները, գլխավոր դատախազության հետ համատեղ, վերջին 24 ժամվա ընթացքում Թբիլիսիում և Սամեգրելոյի շրջանում, դատավորի որոշման հիման վրա համապարփակ քննչական գործողությունների արդյունքում, պոռնկագործությանը նպաստելու և պոռնկագործության համար տարածք տրամադրելու մեղադրանքով ձերբակալել են 12 անձի և փակել 13 օբյեկտ։ Այս մասին հայտնել է Կենտրոնական քրեական ոստիկանության դեպարտամենտի կազմակերպված հանցավորության դեմ պայքարի գլխավոր վարչության թրաֆիքինգի և ապօրինի միգրացիայի դեմ պայքարի վարչության պետ Թորնիկե Մարսագիշվիլին բրիֆինգի ժամանակ։

Ինչպես նշել է Մարսագիշվիլին, ձերբակալվածների թվում կան ինչպես Վրաստանի, այնպես էլ Չինաստանի քաղաքացիներ։

«Իրավապահների կողմից քրեական գործով իրականացված գաղտնի քննչական գործողությունների՝ մասնավորապես աուդիո և վիդեո ձայնագրությունների արդյունքում ձեռք բերված ապացույցները վկայում են, որ օբյեկտների մենեջերներն ու ադմինիստրատորները համակարգված աջակցություն էին ցուցաբերում պոռնկագործությամբ զբաղվող կանանց։ Մասնավորապես, նրանք Թբիլիսիի Մարջանիշվիլիի, Աղմաշենեբելիի, Դադիանիի և Ծինամձղվրիշվիլիի փողոցներում գտնվող օբյեկտներում որոշակի գումարի դիմաց նրանց տրամադրում էին տարածքներ։

Քննությամբ նաև պարզվել է, որ այդ օբյեկտների ադմինիստրատորները օգնում էին կանանց հաճախորդներ գտնելու հարցում, և փոխարենը ստանում էին գումար՝ սեռական ծառայությունների դիմաց նրանց կողմից ստացված վարձատրությունից։

Նույնպես պարզվել է, որ այդ օբյեկտների հիմնական եկամուտը կազմել է պոռնկագործությանը նպաստելու արդյունքում ստացված գումարը։ Իրավապահները խուզարկությունների արդյունքում առգրավել են գումար, որը ենթադրաբար ստացվել է պոռնկագործությանը նպաստելու արդյունքում», – նշել է Թորնիկե Մարսագիշվիլին։

Նրա խոսքով, նշված հանցագործությունները նախատեսում են մինչև չորս տարվա ազատազրկում։

«Քննությունը կատարվում է Վրաստանի քրեական օրենսգրքի 254-րդ հոդվածով, որը վերաբերում է պոռնկագործությանը նպաստելուն և դրա համար տարածք տրամադրելուն», – հայտարարել է Թորնիկե Մարսագիշվիլին։