Վրաստանի խորհրդարանի նախագահ Շալվա Պապուաշվիլիի հայտարարությամբ՝ նախկին Հարավային Օսեթիի ինքնավար շրջանի տարածքում ստեղծված վարչական-տարածքային միավորի վարչությունը լուծարվում է։

Նրա խոսքով՝ կառավարության հետ խորհրդակցությունների արդյունքում մշակվել է մի շարք օրենսդրական նախաձեռնություն, որը ներկայացվելու է խորհրդարանի բյուրոյի այսօրվա նիստում։ Պապուաշվիլիի տեղեկացմամբ՝ Վրաստանի խորհրդարանը նախատեսում է փոփոխությունները ընդունել մինչև տարվա վերջ։

«Հասարակությանը հիշեցնեմ, որ 2006 թվականի նոյեմբերին «Ազգային շարժման» իշխանության կազմակերպմամբ Ցխինվալիի շրջանում անցկացվեցին հակասահմանադրական ընտրություններ, որոնց արդյունքում հայտարարվեց այսպես կոչված Հարավային Օսեթիի «նախագահ» և ձևավորվեց Հարավային Օսեթիի «այլընտրանքային կառավարություն»։ Այդ քայլով այդ ժամանակվա իշխանությունները սեպարատիստական գործընթացներին անուղղակի լեգիտիմություն տվեցին, ինչը Վրաստանի պետական շահերի բացահայտ և ծանր դավաճանություն էր։

Մի քանի ամիս անց՝ 2007 թվականի հունիսին, կրկին սահմանադրության խախտմամբ ստեղծվեց «ժամանակավոր վարչական-տարածքային միավորի վարչություն», որը հիմնադրվեց նույն հակասահմանադրական «այլընտրանքային կառավարության» հիման վրա։ Այս որոշմամբ արհեստականորեն վերականգնվեցին 1990-ին վերացած Հարավային Օսեթիի ինքնավար շրջանի վարչական սահմանները, ինչը հետագայում դարձավ 2008 թվականի ռուսական ռազմական ագրեսիայի և Վրաստանի պատմական տարածաշրջանի՝ Սամաչաբլոյի օկուպացման նպաստող հանգամանքներից մեկը։

Այսօր պարզ է, որ այդ որոշումները արտաքին ուժերի աշխարհաքաղաքական խաղի մաս էին, որտեղ Վրաստանին բաժին էր հասել «զոհաբերվող խաղաքարի» դեր։ Սաակաշվիլիի ձեռքով իրականացված քաղաքականությունն հանգեցրեց տարածաշրջանում իրավիճակի սրմանը և ի վերջո երկիրը տարավ պատերազմի։

Այս համատեքստում Վրաստանի խորհրդարանի պատգամավորները գնահատեցին այդ որոշումը որպես կոպիտ դավաճանություն Վրաստանի ազգային շահերի դեմ, ինչը արտացոլվել է նաև սահմանադրական հայցում, որով պահանջվում է «Ազգային շարժման» հակասահմանադրական ճանաչումը։ Հատուկ պետք է ընդգծել, որ այն ժամանակ, երբ Վրաստանը տարիներ շարունակ աշխատում է չճանաչման քաղաքականության ամրապնդման ուղղությամբ, «Ազգային շարժման» ռեժիմի կողմից «Հարավային Օսեթի» տերմինի անուղղակի օգտագործումը հենց սկզբից եղել է սահմանադրության և ազգային շահերի դավաճանություն։ Վրացական իրավական և քաղաքական տարածքում ոչ մի «Հարավային Օսեթի» գոյություն չունի։

Հետևաբար, կառավարության հետ խորհրդակցությունների արդյունքում մենք կայացրել ենք որոշում՝ լուծարելու նախկին Հարավային Օսեթիի ինքնավար շրջանի տարածքում ստեղծված վարչական-տարածքային միավորի վարչությունը։

Միաժամանակ պետք է ընդգծել, որ շարունակում են գործել Ախալգորիի, Քուրթայի, Թիղվիի և Էրեդվիի մունիցիպալիտետները, որոնք ընտրվել են 2006 թվականին՝ սահմանադրության ամբողջական պահպանմամբ։ Այս մունիցիպալիտետները Ցխինվալիի շրջանում միակ լեգիտիմ ընտրված և գործող իշխանություններն են և այսպիսով Վրաստանի իրավական և սահմանադրական շրջանակի միակ օրինական շարունակությունը», – հայտարարել է Պապուաշվիլին։