ՆԱՏՕ-ի յուրահատկությունն այն է, որ նա ինքնուրույն է ընդունում ընդլայնման որոշումը, և ոչ մի երկիր իրավունք չունի միջամտելու ընդլայնման քաղաքականությանը,- այս մասին հայտարարել է Վրաստանի արտաքին գործերի նախարար Դավիթ Զալկալիանին։

Պատասխանելով Ռուսաստանի նախագահ Վլադիմիր Պուտինի հայտարարության մասին լրագրողների հարցին՝ նախարարն ասել է, որ «Ռուսաստանին անհրաժեշտ են իրավական երաշխիքներ, որոնք բացառում են ՆԱՏՕ-ի ընդլայնումը դեպի արևելք»։

«ՆԱՏՕ-ի յուրահատկությունը կայանում է նրանում, որ ՆԱՏՕ-ն ինքնուրույն է որոշում ընդլայնման մասին, և ոչ մի երկիր իրավունք չունի միջամտելու ընդլայնման քաղաքականությանը։ Ուղիղ Վաշինգտոնի պայմանագրի տասներորդ պարբերությունում այս առումով շատ հստակ արձանագրություն կա, որ ցանկացած եվրոպական ժողովրդավարություն իրավունք ունի ընտրելու Դաշինքին միանալու հարցը: Սա երկրի, ինչպես նաև ՆԱՏՕ-ի ինքնիշխան իրավունքն է՝ որոշել, թե ով է համապատասխանում ՆԱՏՕ-ին անդամակցելու չափանիշներին»,- ասել է Դավիթ Զալկալիանին։

Հարցին, թե արդյոք նման հայտարարությունները զսպող գործոն կլինե՞ն, Զալկալիանին ասել է. «Կարծում եմ, որ ամենակարևորն այն է, որ ՆԱՏՕ-ի երկրները միասնություն և հստակ դիրքորոշում ցուցաբերեն, և նրանք միասնական էին իրենց որոշումներում։ Որովհետև այս դեպքում միակ ճիշտ պատասխանը կլինի ամուր կանգնել այն սկզբունքների և հիմքերի վրա, որոնց վրա հիմնված է այս կազմակերպությունը»։