Ռուսաստանի արտաքին գործերի նախարարությունը արձագանքում է ԱՄՆ-ի կողմից նավթատարի առգրավմանը: Նախարարությունը պահանջում է, որ ԱՄՆ-ն ապահովի «մարդկային և արժանապատիվ վերաբերմունք» «Մարիներա» նավի վրա գտնվող ռուսների համար:

Նախարարությունը հայտարարել է, որ ԱՄՆ-ն չպետք է խոչընդոտի նրանց «արագ վերադարձին» հայրենիք:

«Հաշվի առնելով նավի վրա Ռուսաստանի քաղաքացիների առկայության մասին ստացված տեղեկատվությունը, մենք պահանջում ենք, որ ամերիկյան կողմը ապահովի մարդկային և արժանապատիվ վերաբերմունք, խստորեն հարգի նրանց իրավունքներն ու շահերը և չխոչընդոտի նրանց արագ վերադարձին հայրենիք», – ասել է նախարարությունը:

Ռուսաստանի տրանսպորտի նախարարությունը նույնպես արձագանքում է ԱՄՆ-ի կողմից նավթատարի առգրավմանը: Նախարարության խոսքով, ԱՄՆ-ի կողմից նավթատարի առգրավումը ծովային իրավունքի խախտում է:

«Այսօր, մոտավորապես Մոսկվայի ժամանակով ժամը 15:00-ին, ԱՄՆ ռազմածովային ուժերը միջազգային տարածքային ջրերում, բաց ծովում, կալանավորել են նավ: Նավի հետ կապը կորել է: Համաձայն 1982 թվականի ՄԱԿ-ի Ծովային իրավունքի մասին կոնվենցիայի, նավարկության ազատությունը տարածվում է բաց ծովում, և ոչ մի պետություն իրավունք չունի ուժ կիրառել այլ պետության իրավասության ներքո պատշաճ կերպով գրանցված նավերի նկատմամբ», – ասվում է հայտարարության մեջ:

Տեղեկատվության համար նշենք, որ ԱՄՆ-ն կալանավորել է Վենեսուելայի և Ռուսաստանի հետ կապված նավթատար նավ։ ԱՄՆ զինվորականների աջակցությամբ իրականացված գործողությունը գլխավորել է Հայրենիքի անվտանգության նախարարությունը։