Մոլդովայի Գագաուզիայի ինքնավար տարածքային միավորի ղեկավար Եվգենյա Գուցուլին անսպասելիորեն ժամանել է Մոսկվա և Մոլդովայի իշխանություններին մեղադրել է տարածաշրջանը ճնշելու մեջ։

Մոլդովական լրատվամիջոցների փոխանցմամբ՝ ՌԴ Խորհրդի ղեկավար Վալենտինա Մատվիենկոյի հետ հանդիպմանը Գուցուլը խոսել է տրանսպորտի մատչելիությունը բարելավելու անհրաժեշտության մասին, որպեսզի ինքնավարության բնակչությունը կարողանա մեկնել Ռուսաստան։

«Ցավոք, հիմա Գագաուզիայում մեր իրավունքները ճնշվում են կենտրոնական իշխանության կողմից։ Սա բոլոր սահմաններից դուրս է։ Մենք երկար տարիներ, տասնամյակներ ընկերներ ենք եղել և լավ հարաբերություններ ենք ունեցել Ռուսաստանի Դաշնության հետ։ Մենք ցանկանում ենք շարունակել ունենալ Ռուսաստանի Դաշնության աջակցությունը։ Մենք ցանկանում ենք, համենայնդեպս, Ռուսաստան ժամանել առանց տրանսֆերների, առանց լոգիստիկայի հետ կապված բարդությունների, քանի որ հիմա դա շատ դժվար է»,- ասել է Եվգենյա Գուցուլը։

Մատվիենկոն իր հերթին նշել է, որ Ռուսաստանը պաշտպանում է ինքնավարության հավասարակշռված, պրագմատիկ կուրսը և պատրաստ է ցուցաբերել հնարավոր բոլոր օգնությունները։ ՌԴ Խորհրդի ղեկավարը Քիշնևի քաղաքական կուրսն անվանել է ռուսաֆոբ: