Միխեիլ Սարջվելաձե. Ինսուլինի հասանելիության որևէ խափանում չկա և չի լինի, մեր շահագրգռվածությունը մեր բնակչության պաշտպանությունն է

Վրաստանում շաքարախտով տառապող բոլոր քաղաքացիները, հատկապես երեխաները, լիովին ապահովված են ֆրանսիական «Sanofi Aventis» ընկերության արտադրած ինսուլինով։ Այս մասին հայտարարել է Վրաստանի առողջապահության նախարար Միխեիլ Սարջվելաձեն մամուլի ասուլիսի ընթացքում։

Նրա խոսքով՝ այս հարցով որևէ խնդիր չկա․

«Այս ինսուլինը կիրառվում է Եվրոպայի բազմաթիվ զարգացած երկրներում։ Հստակ ընդգծում եմ՝ այս միջոցի մատակարարման մեջ երբևէ խափանում չի եղել, հիմա էլ չկա, և ապագայում նույնպես չի նախատեսվում նման բան», – նշել է նախարարը։

Ինչ վերաբերում է երկրորդ տեսակի ինսուլինին՝ դանիական «Novo Nordisk» ընկերության արտադրանքին, Սարջվելաձեի խոսքով՝ այդ ընկերությունը խախտել է պայմանագիրը և չի կատարել մատակարարումների վերաբերյալ իր պարտավորությունները։

«Ներկայումս կա բավական հայտնի ինսուլին, որն արտադրում է դանիական «Նովո Նորդիսկ»-ը։ Ընկերության հետ պայմանագիր է ստորագրվել ապրիլի 14-ին։ Ցավոք, առաջին իսկ առաքման ժամանակ՝ առանց բացատրության, պայմանագիրը խախտվել է։ Մատակարարված դեղորայքի քանակը զգալիորեն պակաս էր նախատեսվածից, այն էլ՝ ուշացումով։ Մինչ օրս այդ պարտավորությունները չեն կատարվել։ Մենք քննարկել ենք բոլոր հնարավոր տարբերակները, որոնք նրանք առաջարկել են, սակայն մինչ այժմ ընկերությունը կոպտորեն խախտում է իր պարտավորությունները։ Ցավալի է, բայց հարկավոր է սա նշել։ Մենք կարծում էինք, որ խնդիրը կարող էր լինել ավելի ցածր մակարդակի ղեկավարության մեջ, որոնք հիմնականում զբաղված են «Օզեմպիկ»-ի վաճառքով։ Այդ պատճառով կապ ենք հաստատել ընկերության բարձր ղեկավարության հետ։ Անձամբ մեկնել եմ և հանդիպել նրանց հետ հոկտեմբերին։ Այն ժամանակ նրանք խոստացան, որ նոյեմբերյան սկզբին կապահովեն մատակարարման կատարումը։ Նույնը գրում են և ասում նաև հիմա՝ խոստանալով մատակարարել մնացած քանակը առաջիկա օրերին։ Սակայն մինչ օրս նրանց պարտավորությունները չեն կատարվել։ Մենք հաշվի ենք առնում 1-ին տիպի շաքարախտով հիվանդների ծնողների դրական վերաբերմունքը այս ապրանքի նկատմամբ և փորձում խուսափել կոշտ քայլերից։ Կրկնում եմ՝ սա արվում է բացառապես հիվանդների և նրանց ընտանիքների շահերից ելնելով», – հայտարարել է Սարջվելաձեն։

Միխեիլ Սարջվելաձեի խոսքով՝ իշխանության առաջնահերթությունը քաղաքացիների շահերի պաշտպանությունն է և շաքարախտով հիվանդների անխափան ապահովումը բարձրորակ դեղամիջոցներով։

Նրա խոսքերով՝ պետությունը շարունակելու է համագործակցել այն ընկերությունների հետ, որոնք առաջնահերթություն են տալիս հիվանդների շահերին։

«Մեր գլխավոր մտահոգությունն է մեր բնակչության պաշտպանությունը։ Ուստի, բնական է, չեմ ցանկանում ստիպված լինել կոշտ որոշումներ կայացնել տվյալ ընկերության նկատմամբ։ Նրանց արտադրանքը մեր պացիենտներին իսկապես դուր է գալիս։ Մենք կանգնած ենք և կշարունակենք կանգնել բացառապես վրացի հիվանդների կողքին։ Եթե որևէ մատակարար չի դիտարկում վրացի պացիենտին որպես առաջնահերթություն, ապա համագործակցությունը նրանց հետ բնականաբար հեշտ չի լինի։ Մեզ անհրաժեշտ են գործընկերներ, որոնք առաջին տեղում կդնեն մեր քաղաքացիների կարիքները։ Կփորձեմ ամեն ինչ անել, որպեսզի ինսուլինի մատակարարումը վրացի հիվանդների համար անխափան շարունակվի։ Վստահ եղեք՝ նախարարությունը կանի անհրաժեշտ ամեն բան, որպեսզի դա այդպես էլ լինի։

Որոշ անձինք փորձում են տարածել աղավաղված տեղեկատվություն՝ արհեստական պանիկա առաջացնելու նպատակով, որպեսզի հետո դա օգտագործեն քաղաքական շահարկումների համար։ Կրկին հայտարարում եմ՝ այսօր Վրաստանում ոչ մի երեխա ինսուլինի պակաս չի զգում, ինչպես փորձում են ներկայացնել որոշ մարդիկ։ Նման ռիսկ անգամ գոյություն չունի։ Ծնողները հստակ տեղեկացված են, այդ թվում՝ այն մասին, որ «Sanofi»-ի դեղամիջոցների հասանելիությանը որևէ վտանգ չի սպառնում։ Բոլոր բժիշկները պատրաստ են մասնակցել դեղի փոխարինման գործընթացին, և նախարարությունն այս հարցում ներգրավված է։ Բոլորն էլ գիտեն, որ խոսքը շատ բարձրորակ դեղամիջոցի մասին է։ Նրանք իրավասու են ժամանակին տեղեկացված լինել սպասվող փոփոխությունների մասին։ Այդուհանդերձ, ոմանք հայտարարում են, թե պետությունը դադարեցրել է ինսուլինի մատակարարումը։ Սա միտումնավոր սուտ տեղեկատվության տարածում է», – հայտարարել է Միխեիլ Սարջվելաձեն։