«Նոր ուժերի շարժում» շարժման ղեկավար Միխեիլ Սաակաշվիլիին 3 տարով արգելել են մուտք գործել Ուկրաինա: Այս մասին փետրվարի 21-ին հայտարարել է Պետական սահմանապահ ծառայության պետի տեղակալ Վասիլի Սերվատյուկը՝ ի պատասխան փաստաբանների հարցմանը:
«Մոստիսկու Սահմանապահ ջոկատի ղեկավարը որոշել է Վրաստանի նախկին նախագահ Միխեիլ Սաակաշվիլիին մինչեւ 2021 թվականի փետրվարի 13-ը արգելել մուտք գործել Ուկրաինա», – ասվում է հաղորդագրության մեջ: Պետական սահմանապահ ծառայության ղեկավարությունը համարում է, որ այս որոշումը լիովին համապատասխանում է Ուկրաինայի ներկա օրենսդրության պահանջներին:
Գերատեսչությունը նշում է, որ փետրվարի 12-ին Սաակաշվիլիի ռեադմիսիան իրականացվել է ստանդարտ ընթացակարգի համաձայն, քանի որ նա դատական որոշումներից հետո ապօրինի կերպով մնացել է Ուկրաինայի տարածքում:
Սաակաշվիլիի փաստաբանները նշում են, որ այս որոշումը ապօրինի է եւ մտադիր են այն բողոքարկել: Բացի այդ, նա ասել է, որ մտադիր է վերականգնել Ուկրաինայի քաղաքացիությունը:
