Վրաստանի նախկին նախագահ Միխեիլ Սաակաշվիլին սոցիալական ցանցերում արձագանքել է Եվրախորհրդարանի կողմից այսօր ընդունված բանաձեւին։

«Շնորհակալ եմ եվրոպացի խորհրդարանականներին, որ երբեք չխորշեցին ինձ հիշատակելուց, այդ թվում՝ բանաձեւերում, ի տարբերություն վրացական քննադատական ​​լրատվամիջոցների»,- գրում է Միխեիլ Սաակաշվիլին։

Եվրախորհրդարանն ընդունել է «Վրաստանում քաղաքական իրավիճակի վատթարացման մասին» բանաձեւը։ Ընդունված բանաձեւը միավորում է հինգ քաղաքական խմբերի պատգամավորների ներկայացրած նախագծերը։ Բանաձեւի նախագծում, որը հավանության է արժանացել Եվրախորհրդարանի կողմից, լրացում է եղել Միխեիլ Սաակաշվիլիի վերաբերյալ։ Բանաձեւին, մասնավորապես, ավելացվել է պարբերություն, ըստ որի՝ «Եվրախորհրդարանը կոչ է անում «Վրացական երազանքի» կառավարությանը ապահովել Եվրախորհրդարանի պատգամավորների անարգել մուտքը Միխեիլ Սաակաշվիլիին։ Ըստ այդմ, բանաձևի 27-րդ հոդվածը ձևակերպվել է հետևյալ կերպ. «Խստորեն կրկնում է իր հրատապ պահանջը՝ անհապաղ ազատ արձակել նախկին նախագահ Միխեիլ Սաակաշվիլիին մարդասիրական նկատառումներով, մասնավորապես՝ արտերկրում բուժում ստանալու նպատակով. Շեշտում է, որ ինքնահռչակ կառավարությունը լիակատար և անվիճելի պատասխանատվություն է կրում նախկին նախագահ Միխեիլ Սաակաշվիլիի կյանքի, առողջության, անվտանգության և բարեկեցության համար և պետք է ամբողջությամբ պատասխանատվություն կրի իրեն պատճառված ցանկացած վնասի համար. «Վրացական երազանքի» կառավարությանը կոչ է անում ապահովել Եվրախորհրդարանի անդամների անարգել մուտքը Միխեիլ Սաակաշվիլիին։