Այսօր միջազգային ասպարեզում բարձր պետք է հնչի վրացի դիվանագետների ձայնը՝ որ Վրաստանը երբեք չի հրաժարվի իր ինքնիշխանությունից և ընտրությունից՝ ապրել ազատ, ժողովրդավարական և խաղաղ պետությունում,— այս մասին հայտարարել է Վրաստանի նախագահ Միխեիլ Ղավելաշվիլին՝ Դիվանագետի օրվան նվիրված միջոցառման ժամանակ ունեցած ելույթում։

Վրաստանի նախագահ Միխեիլ Ղավելաշվիլիի խոսքով՝ միջազգային հարթակում երկրի ազգային շահերի պաշտպանության գործում դիվանագետների դերը հատկապես մեծ է։

«Այս օրը կրում է յուրահատուկ խորհրդանշական նշանակություն, քանի որ կապված է մեծ վրացի գրողի, հասարակական գործչի և դիվանագետի՝ Սուլխան-Սաբա Օրբելիանիի անվան հետ։ 2020 թվականից սկսած արդեն ավանդույթ է դարձել, որ Դիվանագետի օրվա կապակցությամբ, այն վաստակաշատ դիվանագետներին, ովքեր մեծ ծառայություն ունեն մեր երկրի և ժողովրդի հանդեպ, շնորհվում է Սուլխան-Սաբա Օրբելիանիի անվան գերատեսչական պարգև, ինչը, անշուշտ, ողջունելի է։ Խորհրդանշական է նաև, որ այսօրվա միջոցառումը նվիրված է Առաջին դեմոկրատական հանրապետության արտաքին գործերի նախարարի, Ֆրանսիայում արտակարգ և լիազոր դեսպան Ակակի Չխենկելու հիշատակին, և այս տարի, առաջին անգամ, վրացի դիվանագետներին կհանձնվի Ակակի Չխենկելու անվան գերատեսչական պարգև։ Այսօր, երբ գլոբալ մակարդակով պետությունների միջև հարաբերությունները դառնում են ավելի ու ավելի ինտենսիվ, միջազգային ասպարեզում մեր ազգային շահերի պաշտպանությունում ձեր՝ դիվանագետներիդ դերը հատկապես կարևոր է։ Ուժեղ դիվանագիտական կորպուսը, որը պաշտպանում է պետության շահերը, ուժեղ պետության գլխավոր երաշխիքներից մեկն է», — ասել է Միխեիլ Ղավելաշվիլին։

Ինչպես նշել է Վրաստանի նախագահը իր ելույթում, դիվանագետների գործունեությունը ռազմավարական կարևորություն ունի Վրաստանի տնտեսական և մշակութային հարաբերությունների ձևավորման ու ամրապնդման տեսանկյունից տարբեր երկրների հետ։

«Ձեր շնորհիվ է, որ պաշտպանվում և ամրապնդվում է մեր երկրի դիրքը միջազգային ասպարեզում, դուք եք համոզում բոլորին, որ մենք՝ փոքր, բայց մեծ պատմություն, մշակույթ և ավանդույթներ ունեցող ժողովուրդ ենք։ Այսօրվա բարդագույն աշխարհաքաղաքական իրավիճակի պայմաններում յուրաքանչյուր վրացու համար առավել կարևոր է ձեր պրոֆեսիոնալիզմը և հայրենիքի հանդեպ անշուշտ նվիրվածությունը։ Ձեր դերը մեծ է մեր երկրի ինքնիշխանության պաշտպանության և խաղաղության պահպանման գործում։ Նույնպես, ձեր աշխատանքը ռազմավարական նշանակություն ունի Վրաստանի տնտեսական և մշակութային կապերի զարգացման առումով», — նշել է Միխեիլ Ղավելաշվիլին։

Վրաստանի նախագահի խոսքով՝ պատասխանատվության հետ մեկտեղ, մեծ պատիվ է ծառայել քո ժողովրդին, պետությանը և պաշտպանել երկրի լավագույն շահերը։

«Հպարտանում եմ, որ Վրաստանը տարբեր երկրներում ներկայացնում են հենց ձեր նման պրոֆեսիոնալներ։ Այսօր միջազգային ասպարեզում հնչեղ պետք է հնչի վրացի դիվանագետների ձայնը՝ որ Վրաստանը երբեք չի հրաժարվի իր ինքնիշխանությունից և ընտրությունից՝ ապրել ազատ, ժողովրդավարական և խաղաղ պետությունում։ Այս առաքելությունը հենց ձեզ է վստահված, և ես հավատում եմ, որ մասնագիտական ստանդարտների նկատմամբ հավատարմությամբ դուք բարեխղճորեն կիրականացնեք ձեզ հանձնված պարտականությունը։

Վերջում ուզում եմ խորին հարգանքով շնորհավորել Սուլխան-Սաբա Օրբելիանիի և Ակակի Չխենկելու անվան գերատեսչական պարգևների դափնեկիրներին։ Իսկ բոլոր դիվանագետներին ևս մեկ անգամ շնորհավորում եմ ձեր մասնագիտական օրվա կապակցությամբ և հաջողություն եմ մաղթում ձեր պատասխանատու գործունեության մեջ», — նշել է Միխեիլ Ղավելաշվիլին իր ելույթում։

Միջոցառմանը մասնակցել են Վրաստանի վարչապետ Իրակլի Կոբախիձեն, խորհրդարանի նախագահ Շալվա Պապուաշվիլին, Թբիլիսիի քաղաքապետ Կախա Կալաձեն, գործադիր և օրենսդիր իշխանության ներկայացուցիչներ, պատրիարքարանի և դիվանագիտական կորպուսի անդամներ, ինչպես նաև հրավիրված հյուրեր։