Վրաստանի նախագահ Միխեիլ Ղավելաշվիլին հանդիպել է Վրաստանում Չինաստանի Ժողովրդական Հանրապետության դեսպան Չժոու Ցիանի հետ։

Ներածական հանդիպմանը Չինաստանի դեսպանը շնորհավորել է Միխեիլ Ղավելաշվիլիին նախագահի պաշտոնը ստանձնելու կապակցությամբ և հաջողություններ մաղթել հետագա գործունեության մեջ։

Հանդիպմանը քննարկվել է Վրաստանի և Չինաստանի միջև ռազմավարական գործընկերությունը։ Զրույցն անդրադարձել է քաղաքական, առևտրատնտեսական, մշակութային և ժողովուրդների միջև հարաբերությունների խորացման հեռանկարներին։

Վրաստանի նախագահը նշել է, որ ազատ առևտուրը, ռազմավարական գործընկերությունը և առանց վիզայի ռեժիմը նպաստում են վրաց-չինական հարաբերությունների հետագա զարգացմանը, մարդկանց միջև շփումների, գործարար կապերի և տնտեսական համագործակցության ամրապնդմանը։ Ուշադրություն է դարձվել Միջին միջանցքի և Վրաստանի տարանցիկ դերի կարևորությանը։

Նախագահը հայտարարել է, որ Վրաստանը պատրաստ է առավելագույնս նպաստել Միջին միջանցքի զարգացմանը, անվտանգությանը և արդյունավետ գործունեությանը։

Հանդիպմանը քննարկվել են տարածաշրջանի և միջազգային հանրության առջև ծառացած մարտահրավերները և ընդգծել կայունության և խաղաղության առանձնահատուկ կարևորությունը։

Վրաստանի նախագահը դիվանագետին հյուրընկալել է նախագահական նստավայրում։

Այս մասին հայտնում է Վրաստանի նախագահի մամուլի ծառայությունը։