Միջազգային Ատոմային էներգետիկայի գործակալության (IAEA) ղեկավարն ասում է, որ Իրանը կկարողանա վերականգնել վնասված միջուկային կենտրոնները
Միջազգային ատոմային էներգիայի գործակալությունում հայտարարում են, որ Իրանը կկարողանա վերականգնել վնասված միջուկային կենտրոնները։ Գործակալությունում նշում են, որ Թեհրանը ունի համապատասխան տեխնիկական գիտելիքներ, արտադրական ներուժ, ինչը ոչ ոք չի հերքում։ Հայտարարությունը արել է գործակալության ղեկավարը՝ Ռաֆայել Գրոսին, Ավստրիայում այցելության ընթացքում։
Գրոսիի խոսքով՝ Իրանի միջուկային ենթակառուցվածքի մի մասը փրկվել է հարվածներից։ Նա հրաժարվել է պատասխանել հարցին, թե որքանով է հարվածների արդյունքում հետ մղվել Իրանի միջուկային ծրագիրը, որոնք իրականացրել են Իսրայելը և ԱՄՆ-ը։
«Ես չեմ սիրում այս ամենը քննարկել այնպես, կարծես ավազե ժամացույցին նայում ենք։ Ռազմական գործողությունն ունի իր տրամաբանությունը, և ես այստեղ չեմ, որ գնահատեմ՝ լավ էր, թե վատ։ Մենք ունենք այն իրավիճակը, ինչ ունենք», — հայտարարել է Գրոսին։
Նա հավելել է, որ այժմ կարևոր է աշխատել Իրանի հետ՝ երկարաժամկետ լուծում գտնելու համար։
Հիշեցնենք, Իսրայելի հատուկ ծառայությունների նախնական գնահատմամբ՝ ԱՄՆ-ի հարվածների հետևանքով Իրանի միջուկային օբյեկտներին հասցված վնասը «շատ զգալի է եղել»։
«Մենք չենք կարծում, որ գործողությունն ընթացել է ծրագրից տարբեր։ Չկան նշաններ, որ բունկերային ռումբերը չեն աշխատել։ Ոչ ոք հիասթափված չէ», — նշել են Իսրայելի հետախուզությունում։
Իր հերթին Իրանում նույնպես հայտարարել են, որ Իսրայելի և ԱՄՆ-ի հարվածների հետևանքով միջուկային օբյեկտները լուրջ վնաս են կրել։