Մևլութ Չավուշօղլուն հայտարարում է, որ Թուրքիան որոշել է վերականգնել դիվանագիտական հարաբերությունները Իսրայելի հետ
Թուրքիան որոշել է վերականգնել դիվանագիտական հարաբերությունները Իսրայելի հետ,- հայտարարել է երկրի արտաքին գործերի նախարար Մևլութ Չավուշօղլուն։
Իսրայելում Թուրքիայի լիիրավ դեսպանի թեկնածությունը կներկայացվի մոտ ժամանակներս։
«Որոշում է կայացվել Իսրայելում դեսպան նշանակելու մասին, այս հարցի վերաբերյալ դրական արձագանք է ստացվել նաեւ իսրայելական կողմից։ Շուտով մեր թեկնածությունը կներկայացվի նախագահին»,- ասել է Չավուշօղլուն։
Իսրայելը նույնպես ողջունում է Թուրքիայի հետ դիվանագիտական հարաբերությունների վերականգնումը։ Նախագահ Իցհակ Հերցոգի խոսքով՝ դա կնպաստի տնտեսական հարաբերությունների զարգացմանը։
Թուրքիայի և Իսրայելի միջև հարաբերությունները սրվեցին 2010 թվականին, երբ իսրայելական հատուկ ջոկատայինները գործողություն սկսեցին Թուրքիայից Գազայի հատված մեկնող նավի վրա, որի հետևանքով սպանվեցին Թուրքիայի 8 քաղաքացիներ և մեկ թուրք-ամերիկացի: