Մեծ Բրիտանիայի ֆինանսների նախարար Ֆիլիպ Համոնդը նախազգուշացրել է, որ Լոնդոնը անհրաժեշտ քայլերի կդիմի, եթե ապացուցվի, որ օտար պետություն է ներգրավված Անգլիայի Սոլսբերի քաղաքում ռուսական հետախուզական վարչության նախկին աշխատակից Սերգեյ Սկրիպալի և նրա դուստր Յուլիայի թունավորմանը: Այդ մասին հայտնում է  Ռոյտերս գործակալությունը:

«Մենք պետք է թույլ տանք՝ հետաքննությունն ընթանա, ինչպես կարգն է: Եթե այդ հետաքննության արդյունքներով ապացուցվի օտար պետության մասնակցությունը, դա, իհարկե, շատ լուրջ կլինի: Կառավարությունը դրան կարձագանքի համապատասխան ձևով»,- ասել է Համոնդը:

Հիշեցնենք, որ 66-ամյա Սկրիպալը և նրա դուստրը մարտի 4-ին ենթարկվել են անհայտ նյութի ազդեցության անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։ Նրանք գտնվում են հիվանդանոցում ծայրահեղ ծանր վիճակում: