Սոխումիի անկման օրը ՝ սեպտեմբերի 27-ը, Վրաստանի նորագույն պատմության ամենացավոտ ամսաթվերից մեկն է, դա մի օր է, որը մեզ հիշեցնում է պատերազմի ավերիչ և կործանարար ուժի մասին և կապված է ամենամեծ ցավի և կորստի հետ,- այս մասին սոցիալական ցանցում գրել է Վրաստանի արտաքին գործերի նախարար Դավիթ Զալկալիանին:

«Այս պատերազմում մենք կորցրինք մեր երկրի լավագույն երեխաներին, հազարավոր խաղաղ բնակիչների, հայրենասերների, ովքեր իրենց կյանքը զոհաբերեցին երկրի զոհասեղանին:

Այս պատերազմը ողբերգություն է բոլորի համար, որն ուղղված էր ինչպես վրացիների, այնպես էլ աբխազների դեմ: Այս պատերազմում անհնար է հաղթող ունենալ: Ցավը, որ մենք և մեր աբխազ եղբայրներն ու քույրերը երկար տարիներ ապրել ենք, մնում է չբուժված վերք:

Միայն մեր միասնությունն ու խաղաղ համակեցությունը կբուժեն այս վերքը: Մենք պետք է հետ բերենք աբխազներին, ոչ միայն Աբխազիան, որը ժամանակավորապես անջատված վայր է, այլ աբխազների սերը, նրանց հետ բարեկամությունը, դարեր շարունակ մեզ միավորած մշակույթը և ավանդույթները: Մենք մեկ հողի և ջրի երեխաներ ենք և անհնար է մեզ տարանջատել արհեստական ​​պատնեշներով ու փշալարերով:

Վրաստանը ձգտում է խաղաղ ապագայի, և մենք դա առաջարկում ենք աբխազ եղբայրներին: Վրացիներն ու աբխազները գնալու տեղ չունեն, մենք ապրում ենք մեկ հողի վրա, մեր երեխաները պետք է մեծանան մեկ երկրում, և մենք բոլորս պետք է մասնակցենք այս երկրի միասնական ապագայի կերտմանը: Միայն միասնական ուժով մենք կկարողանանք ստեղծել ավելի լավ երկիր ՝ անկախ, տնտեսապես ուժեղ, եվրոպական պետություն», – գրել է Դավիթ Զալկալիանին սոցիալական ցանցում: