Մցխեթայի Արագվի գետի աջ ափին՝ թատրոնի հարևանությամբ, սկսվում է բազմաֆունկցիոնալ այգու նախագծումը
Ինֆրաստրուկտուրայի նախարարության Մունիցիպալ զարգացման հիմնադրամը Մցխեթայում, թատրոնի հարակից տարածքում, Արագվի գետի աջ ափին սկսում է բազմաֆունկցիոնալ զբոսայգու նախագծումը։
Վրաստանի ինֆրաստրուկտուրայի նախարարության տեղեկությամբ՝ համապատասխան պայմանագիր կնքվել է մրցույթում հաղթած ընկերության հետ, որի շրջանակում ծառայությունների մատուցման և աշխատանքների կատարման ընդհանուր ժամկետը սահմանված է 7 ամիս։
Նրանց տեղեկացմամբ՝ նախագիծը, զբոսայգու կառուցման հետ մեկտեղ, ներառում է նաև թատրոնի վերականգնում։
«Գետափի քաղաքային զբոսայգին կհամախմբի մանկական, մարզական, հանգստի և կրթական գոտիներ, հետիոտն և հեծանվային ուղիների ցանց։ Տարածքում կկառուցվի նաև ավտոկայանատեղի՝ նախատեսված նաև էլեկտրամեքենաների համար։ Նախագիծը ներառում է նաև տեսահսկման ու անվտանգության, արտաքին լուսավորության և ջրամատակարարման համակարգերի տեղադրում։ Նախագծով նախատեսված է Արագվի գետի վրայով անցնող հետիոտնային կամուրջի վերականգնում, ինչպես նաև լանդշաֆտային և ջրային կառույցների ստեղծում։ Քանի որ տարածքը գտնվում է ՅՈՒՆԵՍԿՕ-ի Համաշխարհային ժառանգության «Մցխեթայի պատմական հուշարձաններ» անվանմամբ օբյեկտի բուֆերային գոտում, Մունիցիպալ զարգացման հիմնադրամի պահանջով նախագծի հեղինակը պարտավոր է փաստաթղթերը համաձայնեցնել մունիցիպալիտետի, մշակույթի նախարարության և Մշակութային ժառանգության պահպանության ազգային գործակալության հետ։ Նոր զբոսայգու նախագծման գործընթացում, առկայության դեպքում, պետք է հաշվի առնել նաև ՅՈՒՆԵՍԿՕ-ի Համաշխարհային ժառանգության կոմիտեի և դրա խորհրդատվական կազմակերպությունների առաջարկությունները», – նշվում է Վրաստանի ինֆրաստրուկտուրայի նախարարության տեղեկության մեջ։