Լեհաստանի վարչապետ Մատեուշ Մորավիեցկիի խոսքով՝ Լեհաստանը մերժել է անօրինական միգրանտներին ընդունելու ԵՄ ծրագիրը։

Այս մասին Մատեուշ Մորավիեցկին հայտարարել է իսպանական Գրանադա քաղաքում ԵՄ առաջնորդների հանդիպումից առաջ։

«Այս տարվա հունիսին, կրկին Բեռլինի թելադրանքով, Բրյուսելը լեհ ընդդիմադիր Դոնալդ Տուսկի կուսակցության աջակցությամբ սկսեց իրագործել իր ծրագիրը, որը ենթադրում է անօրինական միգրանտների ընդունում։ Եթե ​​որևէ երկիր հրաժարվի միգրանտներին ընդունելուց, նրանք կենթարկվեն դրակոնյան տուգանքների։ Ես երեկ մի քանի վարչապետների ասել եմ և այսօր էլ լիագումար նիստում կասեմ, որ Լեհաստանը վերջնականապես կմերժի դա, առաջին հերթին մեր երկրի անվտանգության համար», – ասել է Մորավիեցկին։

Համաձայնագրի համաձայն՝ մեծ թվով միգրանտներ ընդունող երկրները կարող են արագացնել ապաստանի ընթացակարգերը և արագ օգնություն խնդրել ԵՄ այլ երկրներից՝ ներառյալ ֆինանսական օգնությունը: Լեհաստանը հրաժարվում է ընդունել ներգաղթյալներին Մերձավոր Արևելքից և Աֆրիկայից։