Մարկո Ռուբիոն և Բենիամին Նեթանյահուն հանդիպել են Երուսաղեմում

Երուսաղեմում հանդիպել են ԱՄՆ պետքարտուղար Մարկո Ռուբիոն և Իսրայելի վարչապետ Բենիամին Նեթանյահուն։ Հանդիպումից հետո կողմերը զրուցել են նաև լրատվամիջոցների հետ։

Բենիամին Նեթանյահուն ասել է, որ նախագահ Թրամփը լավագույն ընկերն է, որ Իսրայելը երբևէ ունեցել է Սպիտակ տանը։

«Նախագահ Թրամփը Սպիտակ տնից Իսրայելի երբևէ ունեցած ամենամեծ ընկերն է: Վաշինգտոն կատարած այցը դա ամեն կերպ ցույց տվեց։ Այսօր ես և պետքարտուղար Ռուբիոն շատ արդյունավետ քննարկում ունեցանք մի շարք հարցերի շուրջ, որոնցից ոչ մեկն ավելի կարևոր չէ, քան Իրանը։ Իսրայելն ու Ամերիկան ​​ուս ուսի են կանգնած իրանական սպառնալիքի դեմ: Մենք համաձայն ենք, որ այաթոլլաները չպետք է միջուկային զենք ունենան։ Մենք նաև համաձայն ենք, որ իրանական ագրեսիան տարածաշրջանում պետք է դադարեցվի»,- նշել է Իսրայելի վարչապետը։

Բացի այդ, Բենիամին Նեթանյահուն ասել է, որ Իսրայելը կկատարի բոլոր ռազմական նպատակները, որոնք դրվել են հոկտեմբերի 7-ին ՀԱՄԱՍ-ի հարձակումից հետո։

«Նախագահ Թրամփն ու ես աշխատում ենք լիարժեք համագործակցության և համակարգման մեջ: Մենք ունենք ընդհանուր ռազմավարություն և չենք կարող միշտ հանրության հետ կիսվել այս ռազմավարության մանրամասներով, այդ թվում՝ երբ կբացվեն «դժոխքի դարպասները», ինչը անխուսափելիորեն տեղի կունենա, եթե մեր բոլոր պատանդները մինչև վերջինը ազատ չարձակվեն։ Իսրայելը հաստատապես վճռական է հասնելու այն բոլոր պատերազմական նպատակներին, որոնք մենք դրել ենք հոկտեմբերի 7-ի սարսափելի հարձակումից հետո։ Մենք մեր բոլոր պատանդներին տուն կբերենք և կապահովենք, որ Գազան այլևս երբեք վտանգ չներկայացնի Իսրայելի համար։ Գազայի հարցում ԱՄՆ-ի միանշանակ աջակցությունը կօգնի մեզ ավելի արագ հասնել այդ նպատակներին»,- հավելել է Նեթանյահուն։

Մարկո Ռուբիոն իր հերթին խոսել է Իրանի կողմից բխող սպառնալիքների մասին։

«Այս բոլոր մարտահրավերների մեջ ընդհանուր թելը Իրանն է: Դա տարածաշրջանում անկայունության միակ ամենամեծ աղբյուրն է, յուրաքանչյուր ահաբեկչական խմբավորման հետևում, բռնության յուրաքանչյուր գործողության հետևում, ամեն ապակայունացնող գործողությունների հետևում, այն ամենի հետևում, որը սպառնում է խաղաղությանը և կայունությանը միլիոնավոր մարդկանց համար, ովքեր այս տարածաշրջանն անվանում են տուն, Իրանն է: Իրան ասելով այաթոլլաներին նկատի ունեմ, Իրան ասելով` նրա ռեժիմը, մի ռեժիմ, որին, ի դեպ, ժողովուրդը չի աջակցում: Իրանի ժողովուրդը այս ռեժիմի զոհն է»,- ասել է Մարկո Ռուբիոն։

Սա Ռուբիոյի առաջին այցն է տարածաշրջան որպես պետքարտուղար։ Պետդեպարտամենտի ներկայացուցչի խոսքով՝ այցի ընթացքում Ռուբիոն կքննարկի ՀԱՄԱՍ-ի կողմից Իսրայելի վրա հարձակումից հետո զարգացումները։