Մեծ Բրիտանիան աջակցում է Վրաստանի անդամակցությանը Եվրամիությանն ու ՆԱՏՕ-ին։ Որքանով ես տեսնում եմ, սա Վրաստանի ինքնիշխան ընտրությունն է, Վրաստանը պետք է որոշի, թե ինչ պետք է անի,- ասել է Վրաստանում Մեծ Բրիտանիայի դեսպան Մարկ Քլեյթոնը։

Դեսպանի խոսքով, սոցիոլոգիական հարցումները ցույց են տալիս, որ վրացիները ցանկանում են լինել Եվրամիությունում և ՆԱՏՕ-ում։

«Վրաստանի անկախության սկզբից ի վեր Մեծ Բրիտանիան եղել է Վրաստանի ամենամոտ գործընկերներից և դաշնակիցներից, Մեծ Բրիտանիան Վրաստանի ինքնիշխանության և տարածքային ամբողջականության չափազանց ուժեղ ջատագովն է։ Ինքնիշխանություն նշանակում է ընտրություն կատարել։ Ուստի, անկախ իմ երկրի դիրքորոշումից և Եվրամիությունից դուրս գալուց, ես հստակ ասում եմ, որ Մեծ Բրիտանիան աջակցում է Վրաստանի անդամակցությանը Եվրամիությանը և ՆԱՏՕ-ին։ Իմ տեսած բոլոր սոցիոլոգիական հարցումներն ասում են, որ վրաց ժողովուրդը ցանկանում է լինել Եվրամիությունում և ՆԱՏՕ-ում։ Բոլոր խոշոր քաղաքական կուսակցություններն ասում են, որ արտաքին քաղաքականության նպատակը Եվրամիությանն ու ՆԱՏՕ-ին անդամակցությունն է։ Ձեր սահմանադրությունն ասում է, որ ցանկանում եք անդամակցել Եվրամիությանը և ՆԱՏՕ-ին: Այնպես որ, որքան ես տեսնում եմ, սա Վրաստանի ինքնիշխան ընտրությունն է։ Թե ինչպես կմեկնաբանի և ինչ կորոշի, կախված է Վրաստանից: Մեծ Բրիտանիան այս ճանապարհին կլինի Վրաստանի կողքին»,- ասաց դեսպանը։